Віцебск: суткі і штрафы ўдзельнікам апошняга маршу салідарнасці
Судовыя працэсы над затрыманымі 6-га верасня ўжо другі дзень праходзяць у ізалятары часовага ўтрымання. У суды людзей не прывозяць – верагодна, апасаюцца масавай падтрымкі з боку аднадумцаў. Сваякі і сябры чакаюць звестак пра судовыя пастановы каля ганкаў ІЧУ, тамсама сустракаюць тых, каго аштрафавалі і выпусцілі з-за кратаў.
Андрэю Анішчанку прысудзілі 8 базавых велічынь – 216 рублёў – штрафу за ўдзел у несанкцыянаванай акцыі:
– Я трапіў у такое месца – паміж міліцыяй і людзьмі. Яны, атрымліваецца, выцягнулі мяне. Рукі заламалі і закінулі ў сіні бус, тварам да падлогі. Потым загрузілі ў аўтазак і прывезлі ў міліцыю. Бо я выказваў сваю пазіцыю. Вось і ўсё.
Андрэя Анішчанку затрымалі на скрыжаванні вуліц Леніна і Замкавай. Тамсама міліцыянты схапілі і Алега Падабаева.
Суд пастанавіў аштрафаваць яго на 10 базавых велічынь – на 270 рублёў – за тое, што заступіўся за свайго сябра.
– Чацьвёра ці пяцёра супрацоўнікаў міліцыі яго збівалі. Я пайшоў сказаць, каб яны спынілі збіццё. Мне сказалі: “Ах, ты памочнік!” А далей я памятаю ўжо тое, як ляжаў на асфальце. Пратаколы склалі на ўсіх аднолькавыя, па шаблоне. А я ішоў сказаць, што незалежна ад таго, якое прозвішча ў прэзідэнта, усё павінна быць чэсна і справядліва. Я павінен быў гэта сказаць!
Тых, каму прысудзілі арышты, пакідаюць у ізалятары часовага ўтрымання надалей. Увогуле ж, суды не спяшаюцца разбіраць справы затрыманых: паводле заканадаўства, чалавека можна ўтрымліваць за кратамі да суду 72 гадзіны. І гэтую магчымасць імкнуцца выкарыстаць па максімуме, каб дэмаралізаваць і запалохаць затрыманых.
Беларускае Радыё Рацыя, Віцебск
Глядзіце таксама
