Віцебскі гарвыканкам – супраць безалкагольнай зоны ў парку
Віцябляне прапанавалі адмовіцца ад продажу алкагольных напояў на разліў у парку ўздоўж рэчкі Віцьба – тут абсталяваны спартовыя пляцоўкі, моладзь бавіць час на роварах або ролікавых каньках, для дзяцей працуюць атракцыёны, можна ўзяць у арэнду катамаран або лодку.
Побач у вулічных кавярнях прадаецца алкаголь, і нецвярозыя грамадзяне толькі псуюць імідж краіны, дзе нібыта змагаюцца за здаровы лад жыцця. Таму віцяблянін Яўген Крыскевіч стварыў петыцыю з просьбай да гарадскіх уладаў, каб гандаль спіртовымі напоямі ў гэтым месцы быў забаронены:
– Парк павінны быць без алкаголю – для актыўнага адпачынку, заняткаў спортам. Для актыўнага ладу жыцця, які павінны быць у нашай краіне, у нашым горадзе. Але з аднаго боку нам прапануюць здаровы лад жыцця, а з другога – цыгарэту ў руку!
Пад петыцыяй падпісаліся 430 чалавек, у адміністрацыі Кастрычніцкага раёну правялі сход па абмеркаванні праблемы. Але прыхільнікі здаровага ладу жыцця не атрымалі падтрымкі з боку ўладаў. У адказе на петыцыю першы намеснік старшыні Віцебскага гарвыканкаму Валянцін Цвяткоў напісаў, што “гандаль алкагольнымі напоямі на разліў у аб’ектах грамадскага харчавання на тэрыторыі набярэжнай ракі Віцьба не супярэчыць дзейнаму заканадаўству Рэспублікі Беларусь”. На думку Яўгена Крыскевіча, адмовіцца ад продажу алкаголю замінае жаданне атрымаць дадатковыя грошы:
– Гэта грошы, у першую чаргу. Ніхто не хоча думаць пра здароўе нацыі. Таму гэта вельмі крыўдна: з аднаго боку, людзі вядуць здаровы лад жыцця, а з другога – каб не забываліся кульнуць шклянку. Бо ў першую чаргу думаюць пра грошы, а пра ўсё астатняе – потым.
Парк уздоўж Віцьбы – адзінае месца ў межах гораду, дзе створаны ўсе ўмовы для заняткаў спортам і сямейнага адпачынку. Таму гараджане прасілі адмяніць продаж алкаголю менавіта тут, падкрэсліваючы, што ў абласным цэнтры ёсць дзясяткі іншых вулічных кавярняў з алкагольным асартыментам. Адмова з боку гарвыканкаму азначае, што гэта прынцыповая пазіцыя ўладаў, таму абскарджваць адказ чыноўніка Яўген Крыскевіч лічыць бессэнсоўным.
Беларускае Радыё Рацыя, Віцебск
Глядзіце таксама
