Віцебскія камунальныя службы не рэагуюць на скаргі. Гараджане пратэстуюць
Жыхар Віцебску Яўген Крыскевіч заклікаў землякоў падпісаць зварот да гарадскіх уладаў і кіраўніцтва службы ЖКГ. У звароце вядзецца пра тое, што камунальнікі ігнаруюць заяўкі віцяблян, пададзеныя праз інтэрнэт-сайт 115.бел.
Адмысловы інтэрнэт-рэсурс 115.бел створаны дзеля таго, каб жыхары розных рэгіёнаў пакідалі заяўкі наконт мясцовых камунальных праблем: пра кепскія дарогі, дрэнную прыборку вуліц, няспраўныя светлафоры, адсутнасць вулічнага асвятлення і гэтак далей. Сайт акамулюе скаргі і перасылае іх адпаведным службовым асобам. Паводле заканадаўства, яны павінны даць справаздачу пра вырашэнне праблемы не пазней як цераз 8 дзён.
Але на віцебскай старонцы сайту ёсць заяўкі, адказу на якія няма з чэрвеня мінулага году. Увогуле ж на 5–га сакавіка на сайце 115.бел зарэгістравана 7 985 скаргі па віцебскіх камунальных праблемах, але вырашана з іх толькі 4 379. Дзе гэта магчыма, мясцовыя жыхары самі змагаюцца з недахопамі. Прыкладам, дапамагаюць дворнікам прыбіраць у сваіх дварах. Аднак у большасці выпадкаў без адмыслоўцаў-камунальнікаў не абыйсціся.
Чаму палова заявак праігнаравана? Таму, што за выкананнем няма кантролю, лічыць стваральнік петыцыі Яўген Крыскевіч. Ён прапануе, каб у Віцебскім гарвыканкаме прызначылі адказнага супрацоўніка, які будзе сачыць за эфектыўнасцю працы са скаргамі грамадзян. Пад петыцыяй падпісаліся 104 чалавекі, збор подпісаў працягваецца.
Колькі дзён таму ў самым цэнтры Віцебску здарыўся беспрэцэдэнтны выпадак: лекары хуткай дапамогі не змаглі спусціцца на бераг Дзвіны па абледзянелых сходах, каб дапамагчы пацярпеламу. За неналежнае выкананне працоўных абавязкаў пакаралі дворнікаў і знялі з пасады дырэктара прадпрыемства “Віцебская гарадская жыллёва-камунальная гаспадарка”. Новаму кіраўніку, прызначанаму на гэтую пасаду, дасталася незайздросная “спадчына”: колькасць камунальных праблем у Віцебску, зафіксаваная на сайце 115.бел, сягае за некалькі тысяч, тады як у Берасці на сённяшні дзень зафіксавана толькі 114 заявак, у Гародні – 834, у Магілеве – 558.
Ганна Ліпка, Беларускае Радыё Рацыя
Глядзіце таксама
