Віцябляніна судзяць за гвалт у дачыненні да службовай асобы
Гэта першы на Віцебшчыне суд па крымінальнай справе, пачатай паволе часткі 1 артыкула 366 КК. Падсудны – Андрэй Цімафеенка, рамеснік, майстар вырабаў з дрэва.
Справу супраць яго пачалі ў аддзеле міліцыі Кастрычніцкага раёна, хаця вінавацяць Цімафеенку за гвалт у дачыненні да супрацоўніка ўнутраных войскаў, распавяла сяброўка сям’і падсуднага, спадарыня Таццяна:
-Перад намі вывелі шыхт вайскоўцаў, і яны не давалі нашай калоне прайсці на плошчу Перамогі. Андрэй хацеў абыйсці, і да яго падыйшлі двое вайскоўцаў. У гэты час некага схапілі, ён гэта заўважыў і адштурхнуў вайскоўца. Напісалі, што ён прычыніў яму фізічны боль. Левай рукой, не кулаком ні ў якім выпадку, проста даланёй.
Падзеі, якія сталі грунтам для крымінальнай справы, адбыліся яшчэ 6-га верасня. У той дзень у Віцебску было некалькі сутычак з міліцыянтамі, і супрацоўнікі міліцыі ўпершыню ўжылі супраць мірных грамадзянаў слезацечны газ. Вядома, што за гвалт супраць міліцыянтаў або вайскоўцаў паводле падзеяў таго дня, распачата адразу некалькі крымінальных справаў. І сёння цяжка прадказваць іх вынікі, кажа праваабаронца Ірына Траццякова:
-Крымiнальныя справы зараз палітычна матываваныя, i таму казаць зараз, чым скончыцца працэс, сыходзячы з цяжкасцi нанесенага ўрону, грамадскай шкоды цi небяспекi i гэтак далей, мы не можам абсалютна. Каб гэта было да 9-га жнiуня, то мы б абапiралiся на працэсуальны кодэкс, крымінальны кодэкс i здаровы сэнс. А цяпер на гэта абапiрацца немагчыма.
У першы дзень разбiральнiцтва суд скончыўся вельмі хутка, бо была занятая адвакатка, якая бароніць падсуднага. Скарыстацца паслугамі дзяржаўнага бясплатнага адваката Цімафеенка не пагадзіўся, і суддзя Сняжана Кiндзеева абвясціла перапынак да 27-га лiстапада. Андрэя Цiмафеенку зноўку адвезлі ў следчы iзалятар, дзе яго трымаюць пад вартай з 30-га верасня. Змянiць меру стрымання на хатні арышт або вызваленне пад заклад органы міліцыі і пракуратуры не пагадзiлiся.
Беларускае Радыё Рацыя, Вiцебск
