Воінскія часткі ў Беларусі абсталёўваюцца сістэмамі відэанагляду
Воінскія часткі ў Беларусі планава аснашчаюцца сістэмамі відэанагляду, пра гэта паведаміў міністр абароны Андрэй Раўкоў.
Сістэмы відэанагляду ўжо ўстаноўлены ў шэрагу частак. „Там, дзе мы робім капітальны рамонт казармаў, устанаўліваем гэтыя сістэмы”, – адзначыў Андрэй Раўкоў. Па такім жа прынцыпе імі будзе аснашчацца і вайсковая частка ў Печах. Цяпер там рамантуецца казарма, запланаваны рамонт яшчэ дзвюх. Міністр расказаў, што намечаны цэлы комплекс мер для паляпшэння матэрыяльнай базы вучэбнага цэнтра. Так, у Печах пачынаецца рамонт клуба, запланаваны ён таксама ў сталовай, лазні.
Закранаючы іншыя задачы, якія стаяць перад цэнтрам, Андрэй Раўкоў нагадаў, што тут трэба будзе завяршыць у планавыя тэрміны выпуск спецыялістаў, якасна падрыхтавацца да прыёму новага папаўнення. „Неабходна падрыхтаваць размяшчэнне, людзей, каб прыняць моладзь і паставіць яе ў строй да прысягі – правесці курс маладога байца”, – растлумачыў міністр.
Па 72-м цэнтры зацверджаны план па ўдасканаленні. Меры маюць кадравы, арганізацыйны, тэхнічны характар. Працэс ідзе, ён планавы. „Сістэма ёсць, яна працуе. Так, у некаторых месцах бываюць збоі і іх трэба ліквідаваць, чым мы і займаемся”, – падкрэсліў Андрэй Раўкоў.
