Вольга Прусак: Штраф мусіць плаціць не Пушкін, а “Еўраопт”
Жыхарка Віцебску, драматург Вольга Прусак ініцыявала флэшмоб у падтрымку мастака Алеся Пушкіна, якога ўчора аштрафавалі за правядзенне несанкцыянаванай акцыі і непадпарадкаванне супрацоўнікам міліцыі. 6 чэрвеня ён правёў перформанс у абарону беларускай мовы і супраць расейскай агрэсіі на прыступках крамы “Еўраопт” ў райцэнтры Крупкі. Нагодай для мастацкай акцыі стаў інцыдэнт з супрацоўнікам крамы: той абражаў беларускую мову і груба размаўляў з пакупніком.
На думку Вольгі Прусак, перформанс Пушкіна – гэта рэакцыя на інцыдэнт, пасля якога “Еўраопт” мусіў выбачыцца перад пакупніком:
-Калі пішуць скаргу, то мусіць быць адказ ад арганізацыі, так? Вось скаргай Алеся Пушкіна і быў яго мастацкі акт! Вы павінны прынесці прабачэнні чалавеку культурнаму, чыя творчасць, чые ідэі застануцца для нашчадкаў. А гэты менеджар, што пакрыўдзіў – ён не будзе для нашчадкаў! Гэта трэба разумець! Не было б і гэтай акцыі, каб проста напісалі прабачэнні чалавеку, які проста нацыянальны здабытак ёсць!
Флэшмоб, які распачала Вольга Прусак, найперш адрасаваны “Еўраопту”. На ганках віцебскай крамы яна сфатаграфавалася са свінячай галавой у какошніку.
Гэты вобраз, паводле яе меркавання, адлюстроўвае нявыхаванасць і, проста кажучы, свінскае стаўленне да ўсяго беларускага. Здымак выкладзены на яе старонцы ў Фэйсбуку разам з заклікам падтрымаць флэшмоб у сацыяльных сетках.
Фота ў падтрымку перформансу Вольгі Прусак
Ганна Ліпка, Беларускае Радыё Рацыя
Фота са старонкі Вольгі Прусак у Фэйсбуку
