„Вясна” звярнулася да Спецдакладчыка ААН па свабодзе мірных сходаў
Праваабарончы цэнтр «Вясна» звярнуўся да Спецыяльнага дакладчыка па пытанні пра права на свабоду мірных сходаў і свабоду асацыяцыяў Клемента Ніалетсосі Вуле з паведамленнем пра парушэнні Рэспублікай Беларусь міжнародных абавязацельстваў у галіне абароны права на мірныя сходы.
У звароце юрыст “Вясны” Аляксей Лойка апісвае спробу правядзення мірнага сходу – “Акцыі вызвалення і салідарнасці”, запланавага на 3 ліпеня апазіцыйным палітыкам Мікалаем Статкевічам і Беларускім нацыянальным кангрэсам. Тады ўсіх назіральнікаў і патэнцыйных удзельнікаў затрымалі супрацоўнікі ў цывільным і даставілі ў РУУС Першамайскага раёна Менска. Там з затрыманымі праводзілі прафілактычныя гутаркі пра недапушчальнасць правядзення несанкцыянаваных уладамі акцый пратэсту ў Менску і праз чатыры з паловай гадзіны адпусцілі без складання пратаколаў.
Мікалая Статкевіча суд Першамайскага раёна прызнаў вінаватым у арганізацыі масавага мерапрыемства без дазволу Менгарвыканкама і аштрафаваў на 40 базавых велічынь (490 долараў ЗША ў эквіваленце).
“Прадстаўнікі сілавых структур, затрымліваючы ўдзельнікаў мірнага сходу, не прадстаўляліся перад удзельнікамі, не прад’яўлялі сваіх службовых пасведчанняў, якія пацвярджаюць іх паўнамоцтвы ажыццяўляць ахову грамадскага правапарадку ад імя дзяржавы, не тлумачылі прычын і падстаў для затрымання”, – адзначае Алексей Лойка.
Праваабаронца падкрэслівае, што беларускія ўлады ў парушэнне артыкула 21 Міжнароднага пакта аб грамадзянскіх і палітычных правах спынілі ўсе спробы ўдзельнікаў «Акцыі вызвалення і салідарнасці» рэалізаваць сваё права на мірныя сходы. Ён просіць спецдакладчыка ААН адрэагаваць на ўказаныя факты ўсімі магчымымі спосабамі.
Паводле spring96.org
Фота Белсат
Глядзіце таксама
