Вызвалены Дзяніс Мазько
На волю выйшаў берасцеец Дзяніс Мазько, якога затрымалі разам з бацькам Майсеем па „справе аб выбухоўцы”. Пра гэта паведаміла ягоная жонка ў Viber-канале праціўнікаў запуску акумулятарнага завода пад Берасцем. На думку пратэстоўцаў і праваабаронцы Уладзіміра Вялічкіна, хутчэй за ўсё невядомыя спрабавалі зладзіць правакацыю ў дачыненні да Майсея і Дзяніса, каб дэзарганізаваць пратэсны рух:
– Каб па балючым месцы ўдарыць, каб усё развалілася і перастала дзейнічаць. Але ў гэтым выпадку яны памыляюцца, таму як усе людзі, якія прымаюць удзел у змаганні супраць гэтага завода, кожны сам па сабе робіць тое, што лічыць патрэбным, тое, што можа рабіць. Калі трэба, яны і свае сродкі ў гэта ўкладваюць, дзейнічаюць адпаведна сваім перакананням. Таму адсутнасць аднаго змагара не паўплывае на ўвесь рух у цэлым.
Майсей Мазько, бацька Дзяніса, выйшаў на волю днём раней. Абодвух затрымлівалі ў межах крымінальнай справы, звязанай з рэчамі, падобнымі да боепрыпасаў, якія знайшлі супрацоўнікі ДАІ ў аўтамабілі, за стырном якога знаходзіўся Майсей Мазько. Бацька і сын з’яўляюцца актывістамі ініцыятыўнай групы супраць будаўніцтва завода АКБ.
Беларускае Радыё Рацыя, Берасце
Фота: Брэсцкая газета
Глядзіце таксама
