Як у Бярозе змагаюцца з пагрозай тэрарызму
У Бярозе страхавыя агенты і іх кліенты вымушаны былі па чацвяргах пералазіць на працу і па страхоўку праз высокі плот. Шапікі страхавых кампаній размешчаны побач з будынкам ДАІ і МРЭА – міжраённага рэгістрацыйна-экзаменацыйнага аддзялення ДАІ, якія па загадзе зверху нечакана сталі рэжымнымі аб’ектамі. На браму і веснічку павесілі замкі. МРЭА пачынае працу ў 11, калі страхагенты – з 8-мі. Супрацоўнікі і кліенты сталі закладнікамі, кажуць страхавыя агенты:
– Сказалі, што ў Берасці нешта здарылася. І пасля гэтага ў нас зачынілі браму, і мы на працу пералазім праз плот. Я сказала начальніку, што акрамя МРЭА тут знаходзімся яшчэ і мы, дайце ключ. Ён адказаў, што нельга.
Намеснік начальніка Бярозаўскай міліцыі Кірыл Тарасікаў патлумачыў сітуацыю і паабяцаў разабрацца:
– Загад атрымалі, бо такая неспакойная сітуацыя ў свеце, а гэта рэжымны аб’ект. Ёсць загад – зачыняць рэжымныя аб’екты, калі ёсць брама, на замок.
Як сказаў былы следчы па асоба важных справах Мікалай Казлоў, пад прапановай барацьбы з тэрарызмам, працу міліцыі засакрэчваюць і выкарыстоўваюць абуральныя метады, якія даходзяць да ідыятызму.
Карасікаў стрымаў слова. Страхаўшчыкі атрымалі ключ ад веснічак, хоць ім зрабілі вусную вымову за прыцягненне да канфлікту прэсы.
Беларускае Радыё Рацыя, Бяроза
Фота armyreporter-ru.livejournal.com
