Як выкарыстоўваюцца канфіскаваныя польскія дамы?
Ніводзін з 16-ці польскіх дамоў у Беларусі, канфіскаваны ўладамі, не выконвае свайго прызначэння, якое палягае на развіцці польскай адукацыі і культуры. Маёмасць, якая некалі належала Саюзу палякаў – ці зруйнаваная, ці здаецца ў арэнду бізнес-структурам.
Яскравы прыклад – Дом польскі ў Гародні. У колішнім цэнтры польскага жыцця ў Беларусі месціцца педыкюрны кабінет, што на думку старшыні галоўнай рады непрызнаванага Саюза палякаў на Беларусі Анжалікі Борыс цалкам адпавядае памкненням улады:
– Уладу насамрэч не цікавіла развіццё польскасці, а цікавіла выключна падкантрольная арганізацыя. Улада гэта атрымала, атрымала падкантрольную, мёртвую структуру, якая да да сёння мае пустуючыя дамы, у якіх не вядзецца навучанне польскай мове. Мы атрымалі падтрымку людзей.
Польскія дамы ў Беларусі былі канфіскаваныя ўладамі пасля 2005 года, калі Саюз палякаў ўзначаліла Анжаліка Борыс. Нягледзячы на нелегальнае становішча, арганізацыя займаецца папулярызацыяй польскай мовы і культуры на тэрыторыі ўсёй краіны.
Беларускае Радыё Рацыя, Гародня
Фота wikipedia.org
