Юрась Беленькі: Не трэба паддавацца на правакацыі
Намеснік старшыні Партыі КХП-БНФ Юрась Беленькі выказаў сваё меркаванне з нагоды сітуацыі, якая склалася вакол Курапатаў.
Нагадаем, што абаронцы Курапатаў працягваюць несці варту ля рэстарана “Поедем, поедим”, які пабудаваны ў непасрэднай блізкасці ад месца масавых расстрэлаў людзей у 30-я гады.
Юрась Беленькі: Наступ на Курапаты ідзе не ўпершыню. Раней была дарога, праз якую спрабавалі знішчыць гэтае месца памяці. Ламалі крыжы, збівалі абаронцаў Курапатаў. Зараз, напрыклад, сярод тых, хто нясе варту, ёсць і наш калега Уладзімір Плотнікаў, і яму яшчэ ў 2001 годзе за абарону Курапатаў міліцыянты адбілі нырку так, што яе затым давялося выдаліць. Але чалавек і зараз стаіць на варце з бел-чырвона-белым сцягам.
Што датычыцца самой сітуацыі, якая склалася, то я згодны з тымі, хто лічыць, што з’яўленне рэстарана ў такім месцы – гэта не прыватная ініцыятыва забудоўшчыкаў. Яны – інструмент, а генератар такой палітыкі знаходзіцца ў Маскве. А беларускія ж улады – яны ў прамой залежнасці ад Крамля. Іншае пытанне: чаму гэта робіцца? Чаму збіраюцца знішчыць Курапаты? Напэўна, ёсць такая задача – зрабіць у Беларусі зачыстку.
РР: Зараз супрацьстаянне працягваецца. Што далей?
Юрась Беленькі: Па-першае, я бачу, што зараз да рэстарана прыязджае шмат правакатараў. І нават сярод абаронцаў ёсць людзі, якія паводзяць сябе, мякка кажучы, неразумна. Фактычна яны працуюць на рэжым, бо лёгка паддаюцца на гэтыя правакацыі і абсалютна не рэагуюць на слушныя заўвагі тых, хто просіць не дыскрэдытаваць абаронцаў Курапатаў.
У той жа час усё гэта спакойна запісваюць на відэа работнікі спецслужб. Яны нават не хаваюць задавальненне ад правакацый і сутычак. Не выключаю, што ў будучым захоп мемарыяла будзе адбывацца на фоне вялікай прапагандысцкай кампаніі. Таму яшчэ раз заклікаю не паддавацца на правакацыі. Калі, натуральна, ты сам не правакатар.
Кастусь Заблоцкі, Беларускае Радыё Рацыя
Глядзіце таксама
