Юрась Губарэвіч: Свята 25 сакавіка натхніла людзей
Старшыня руху «За свабоду» Юрась Губарэвіч распавёў, як ідзе падрыхтоўка да «Чарнобыльскага шляху-2018».
Юрась Губарэвіч: Зараз вырашаем рознага кшталту тэхнічныя пытанні. Найперш гэта пошук сродкаў на пакрыццё ўсіх выдаткаў, якія звязаны з правядзеннем рэкламнай кампаніі і візуалізацыяй мерапрыемства. Калі гарадскія ўлады выставяць рахункі за паслугі, скажам, медыкаў альбо прыборкі тэрыторыі, то пра гэта таксама трэба думаць. Але пакуль што адказу з Менгарвыканкама яшчэ няма.
РР: Колькі ўсяго патрэбна сродкаў на правядзенне “Чарнобыльскага шляху”?
Юрась Губарэвіч: Натуральна, чым больш будзе грошай, там лепш. У такім выпадку можна правесці лепшую інфармацыйную кампанію. Але агулам, думаю, неабходна некалькі тысяч рублёў.
РР: На якую колькасць людзей разлічваеце падчас мерапрыемства?
Юрась Губарэвіч: Разлічваем на вялікую колькасць, але ёсць пэўныя абмежаванні, звязаныя з заяўкай. Там запісана “да тысячы чалавек”, хаця спадзяемся, што прыйдзе значна больш.
РР: На канцэрт у Дзень волі прыйшлі некалькі дзесяткаў тысяч чалавек, хаця фармат там, натуральна, быў зусім іншы…
Юрась Губарэвіч: Фарматы адназначна розныя, але 25 сакавіка засталося шмат незадаволеных тым, што адсутнічала шэсце. У Дзень волі сітуацыя ў пэўнай ступені натхніла людзей да ўдзелу ў вулічных фарматах. Туды прыйшлі грамадзяне, якія больш-менш актыўна сочаць за беларускай палітыкай, цікавяцца падзеямі грамадска-палітычнага жыцця, але раней баяліся выходзіць на вуліцу, каб не патрапіць пад рэпрэсіі за ўдзел у несанкцыянаваным мерапрыемстве. Зараз адбыўся пэўны пералом, і такія людзі змогуць далучыцца да масавага мерапрыемства, якое будзе праходзіць легальна.
Кастусь Заблоцкі, Беларускае Радыё Рацыя
