Юрый Рубцоў: Маёй справай займаецца “Міжнародная амністыя”
Былы беларускі палітвязень Юрый Рубцоў распавёў, што яго апеляцыю на адмову нямецкіх уладаў прадаставіць палітычны прытулак, “могуць разглядзець праз 6-8 месяцаў”.
Нагадаем, што гамяльчанін каля года таму папрасіў у Германіі палітычны прытулак, але не так даўно стала вядома, што нямецкія ўлады далі адмову. Спачатку Юрый Рубцоў заявіў, што не выключае вяртання ў Беларусь, але зараз усё-такі вырашыў абскардзіць рашэнне.
Юрый Рубцоў: Калі я ўбачыў некаторыя недакладнасці ў дакуменце адмовы, то вырашыўся на абскарджванне. Акрамя таго, не выключана, што мог бы атрымаць у Беларусі новы турэмны тэрмін, бо да ад’езду ў Германію стаяў на прафілактычным уліку і парушыў яго.
РР: Калі суд будзе разглядаць вашу апеляцыю?
Юрый Рубцоў: У Нюрнбергу, дзе я зараз знаходжуся, ёсць філіял арганізацыі “Міжнародная амністыя”, яны знайшлі мне адваката. Усімі пытаннямі ён зараз і займаецца. Што датычыцца тэрмінаў разгляду апеляцыі, то вядома, што суд адбудзецца праз 6-8 месяцаў.
РР: Што кажуць адвакаты пра перспектывы справы?
Юрый Рубцоў: Я ведаю, што юрыст, які ёй займаецца (а ён – спецыяліст у вобласці эміграцыі), шчыра кажучы, быў здзіўляены тым, што яго наняла “Міжнародная амністыя”. Але, калі пачытаў дакументы, той сказаў, што праблем не павінна ўзнікнуць. Хаця пабачым, што будзе ў рэальнасці.
Кастусь Заблооцкі, Беларускае Радыё Рацыя
