З палітвязнем Уладзімірам Гундарам аднавілася сувязь
З палітвязнем Уладзімірам Гундарам пасля доўгага маўчання аднавілася сувязь. Родныя ад яго атрымалі кароценькія лісты, даведаліся, што ён жывы, нармальна сябе пачувае.
Кажуць родныя:
– Па крайняй меры я крыху супакоілася ў тым плане, што жывы, больш-менш здаровы, таблеткі даюць ад ціску яму.
Паводле родных, а вось ліст да Уладзіміра не прапусцілі з-за засушанага маленькага кляновага лісточка:
– У мяне якраз быў такі прыгожы засохлы лісточак, ён жа тры гады нічога не бачыў. Мне яго вярнулі і напісалі, што вяртаецца таму, што не дазволенае ўкладанне – сухая расліна.
Хоць, як лічаць родныя, маглі б сухі лісточак выкінуць, а пісьмо аддаць. Але гэта не пра нашы месцы зняволення.
Асуджаны на 20 гадоў калоніі ўзмоцненага рэжыму палітвязень Гундар на тры гады пераведзены па рашэнні суда з Бабруйскай калоніі №2 у крытую Магілёўскую турму №4.
Беларускае Радыё Рацыя
