За што пікетоўшчыкі плацяць міліцыі?
Бярозаўская міліцыя зноў высока ацаніла кошт сваёй паслугі для пікетоўшчыкаў на 25 сакавіка. За гадзіну пікету трое заяўнікаў павінны заплаціць 1 мільён 280 тысяч. Замест аднаго сяржанта, як прасілі заяўнікі пікету, ім прызначылі чатырох асобаў сярэдняга кіроўнага складу з расцэнкай 160 тысяч за гадзіну. „Замест адной гадзіны прапанавалі дзве – іначай нельга”, – сказаў выконваючы абавязкі начальніка аддзела аховы правапарадку Мікалай Пракурат.
Адзін з заяўнікаў пікету Сяржук Русецкі сумняецца ў законнасці прапанавай аплаты:
– Калі праводзіўся пікет 27 ліпеня, міліцыя ў дамове напісала абслугоўванне тры з паловай гадзіны і прысутнічала тады 10 супрацоўнікаў РАУС. Гэтым разам колькасць супрацоўнікаў зменшылі да 4 чалавек і час абслугоўвання скарацілі да 2 гадзін. Такія кошты – дадатковы стрымліваючы фактар правядзення масавых мерапрыемстваў, бо ў час крызісу гэта не такія малыя грошы.
Паводле заяўнікаў пікету, заключэнне дамовы з фізічнымі асобамі не прадугледжана законам. А тое, што пікетоўшчыкі нібыта для пікету выкарыстоўваюць тэрыторыю юрыдычнай асобы – гэта падстава для адмовы, “прыцягнутая за вушы”. Берасцейская міліцыя, да прыкладу, за аналагічныя паслугі грошы не бярэ.
Бярозаўскія заяўнікі пікету плануюць абскардзіць такі падыход мясцовай міліцыі.
Беларускае Радыё Рацыя
Глядзіце таксама
