За вулічны перформанс у Гародні распачатая крымінальная справа
У Гародні 20 кастрычніка затрыманы прадстаўнік мясцовага андэграўнду Ігар Банцар. Ён падазраваны па крымінальнай справе аб хуліганстве.
40-гадовы Ігар Банцар — лідар стрыт-панк-гурту Mister X. Жанаты, у яго двое дзяцей (8 і 10 гадоў). Сёлета падчас акцый пратэсту ён тройчы адбываў адміністрацыйны арышт за ўдзел у мітынгах (усяго — 18 сутак), павінен выплаціць штраф.
Паводле слоў жонкі Банцара Анжалікі Арэхвы, каля 6 гадзін раніцы 20 кастрычніка да іх у кватэру прыйшлі двое міліцыянераў. „Нібыта даставіць яго да следчага. Казалі, што ён хаваўся. Хоць ён не хаваўся. Заўсёды нармальна хадзіў па вуліцы, ні ад каго не ўцякаў”, — сказала яна.
Банцар разам з адвакатам і міліцыянерамі паехаў у аддзяленне. Увечары таго ж дня стала вядома, што ў дачыненні да яго распачатая справа па артыкуле 339 КК (хуліганства). Банцар пакінуты пад вартай на 72 гадзіны.
Вядома, што падставай для справы паслужыла адно з вулічных выступленняў Банцара, калі ён танцаваў перад міліцыяй без ніжняй бялізны.
Позна ўвечары 20 кастрычніка ў кватэры Банцара і Арэхвы прайшоў вобшук, забралі ноўтбук музыканта.
Арэхва лічыць, што мужа затрымалі з-за яго актыўнай грамадзянскай пазіцыі. „Вядома, чаму гэтыя ўсе перформансы былі. Ігар актыўна выказваўся аб тым, што цяпер адбываецца ў краіне”, — сказала яна.
Паводле версіі міліцыі, 5 верасня Банцар каля трох гадзін ночы знаходзіўся ў адной з забаўляльных устаноў Гродна на вуліцы Горкага. Калі музыкант выйшаў на вуліцу, то ўбачыў машыну міліцыі, падышоў да лабавога шкла і стаў дэманстраваць палавыя органы. Яго дзеянні бачылі адпачывальнікі забаўляльнай установы, знялі на камеру і размясцілі ў адным з тэлеграм-каналаў.
Глядзіце таксама
