Затрыманні ў Берасці падчас акцыі супраць акумулятарнага завода (абноўлена)
„У Ленінскі РАУС Берасця былі дастаўлены Аляксандр Абляк, Ягор Кандрацюк і Дзмітрый Бекалюк. Бекалюку стала дрэнна і выкліканая хуткая дапамога забрала яго ў шпіталь, – распавёў Раман Кісляк. У гэты ІЧУ змешчана і актывістка Таццяна Фесікава, якая прыйшла сёння па позве ў 12.00 у райаддзел міліцыі „.
Па некаторых звестках, сёння затрыманы Віталь Казак, якога выклікалі позвай у РАУС, а таксама Віктар Сэндэр. Казак паспеў паведаміць пра сваё затрыманне журналістам, пра затрыманне Сэндэра СМІ паведаміў яго сябар.
12 красавіка у берасцейскі ІЧУ былі змешчаныя 10 праціўнікаў будаўніцтва акумулятарнага завода. Паводле інфармацыі Кісляка, у ноч з 13 на 14 красавіка з ІЧУ вызвалілі Кацярыну Басаргіну, у якой захварэла маленькае дзіця, паведамляе belapan.by.
Чакаецца, што суды над берасцейскімі актывістамі пройдуць 15 красавіка.
* * *
З затрыманых выпусцілі толькі блогера Аляксандра Кабанава, які чатыры гадзіны правёў у Берасцейскім РАУС, пад час правядзення акцыі. “Я чуў як за вакном людзі скандавалі “Не заводу!” і “Жыве Беларусь!”, – падсумаваў ён па выхадзе з пастарунку міліцыі. Сярод затрыманых у нядзелю дакладна вядомыя імёны Віталя Казака і Алеся Абляка, які ачольваў шэсце.
Удзельнікі нядзельнага “кармлення галубоў” і шэсця ў Берасці абураныя затрыманнямі актывістаў. Кажа сябра ініцыятыўнай групы праціўнікаў запуску акумулятарнага заводу “АйПаўэр”, які назваўся Андрэем:
Канешне ўсе абураюцца, усім гэта не падабаецца, навала на простых грамадзян, якія не выстаўляюць ніякіх палітычных пытанняў, якія хочуць жыць у чыстым горадзе. Іх так ганебна затрымліваюць, тым больш затрымліваюць без усялікіх падстаў.
У атачэнні сілавікоў у цывільным і АМАПу прайшла чарговая пратэстная акцыя ў Берасці.
Некалькі соцень праціўнікаў запуску акумулятарнага заводу сабраліся на плошчы Леніна, і „кармленне галубоў” адразу пачалося з затрыманняў блогера Аляксандра Кабанава і актывіста Дзмітрыя Бекалюка. Пасля гэтага ў пратэстоўцаў з’явіўся мегафон і адзін з актывістаў – Алесь Абляк – вырашыў ачоліць збор на плошчы і шэсце:
– Не заводу! Па-першае, я абураны той сітуацыяй, што ўсіх пазакрывалі. Я абураны тым, што адбываецца ў Курапатах. І ўсё, што я магу зрабіць, – гэта казаць гучна. І я раблю ўсё, што ад мяне залежыць. Я ж ведаю, дзе я жыву.
Пасля таго, як шэсце дайшло да кінатэатру „Беларусь”, невядомыя ў цывільным спрабавалі затрымаць Алеся Абляка, які вёў яго. Аднак пратэстоўцы атачылі яго колам і не далі гэтага зрабіць. Ужо на перакрыжаванні вуліцаў Савецкай і праспекту Машэрава, пры падтрымцы супрацоўнікаў АМАПу сілавікам удалося выцягнуць некалькі чалавек у тым ліку і Алеся Абляка, пасадзіць у мікрааўтобус і адвезці ў невядомым накірунку. Акцыя праходзіла на фоне прэвентыўных затрыманняў і скончылася на прыступках ЦУМу. Людзі крычалі: „Не заводу!”, „Жыве Беларусь!” і патрабавалі вызваліць затрыманых у пятніцу. Агульная колькасць затрыманых з улікам прэвентыўных больш за 15 чалавек. Праваабаронцы зараз удакладняюць колькасць і імёны.
* * *
Сёння на плошчы Леніна ў Берасці сабралася больш за 200 праціўнікаў будаўніцтва акумулятарнага завода. Падчас сустрэчы міліцыя затрымала блогера Аляксандра Кабанава і актывіста Дзмітрыя Бекалюка. Іх вінавацяць у парушэнні парадку арганізацыі або правядзення масавых мерапрыемстваў. Таксама былі затрыманыя Аляксандр Абляк і Ягор Кандрацюк. Раней у Ленінскім РАУС была затрыманая актывістка Таццяна Фесікава, куды яе выклікалі позвай. Нагадаю, што напярэдадні былі затрыманыя дзесяць удзельнікаў акцый.
* * *
Чарговая акцыя праціўнікаў будаўніцтва акумулятарнага завода працягваецца. З Берасця перадае наш карэспандэнт:
– Шэсце працягнулася да Цэнтральнага ўнівермага. Людзі скандуюць: „Жыве Беларусь!”, „НЕ заводу!”. І на перакрыжаванні праспекта Машэрава і вуліцы Савецкай затрымана некалькі чалавек. Дакладная колькасць невядома. Але дакладна затрыманы Алесь Абляк. Затрымліваў яго АМАП. Папросту сілавікі ўразаліся ў натоўп і выцягвалі адтуль людзей. Яшчэ да гэтага Абляка спрабавала затрымаць міліцыя і асобы ў цывільным. Але людзі яго атачылі ў кола і абаранілі. І вось зараз ужо АМАПу ўдалося яго затрымаць. Гэта чалавек, які ачоліў сённяшні мітынг і ўзяў у рукі мегафон.
* * *
У Берасці праходзіць чарговая акцыя праціўнікаў будаўніцтва акумулятарнага завода. Як паведамляе наш карэспандэнт, не абышлося без затрыманняў.
– На плошчы Леніна знаходзіцца каля 150 чалавек з ліку праціўнікаў будаўніцтва акумулятарнага завода. Людзі выступаюць у мегафон. Выступіў Алесь Абляк. Ён сказаў пра Курапаты і сітуацыю з заводам АКБ. Акрамя таго напачатку акцыі наўпрост з плошчы забралі блогера Аляксандра Кабанава. Вакол знаходзіцца каля 30 невядомых у цывільным з навушнікамі і відэарэгістратарамі. Яны затрымалі аднаго з лідараў пратэсту Дзмітрыя Бекалюка. На від гэтым людзям 20-25 гадоў. Пратэстоўцы падыйшлі да іх і сказалі – вы ж самі дзеці, што вы робіце?! Пра затрыманых узгадвалі, разбіралі гэтую сітуацыю. Вядома, што заўтра будзе суд.
Як паведамляе наш карэспандэнт, затрыманні працягваюцца.
Беларускае Радыё Рацыя, Берасце
