Аператара „Белсата” Аляксандра Баразенку адпусцілі з міліцыі (абноўлена)
Аператара польскага тэлеканала „Белсат”, што вяшчае для Беларусі, Аляксандра Баразенку, які раніцай 9 мая быў затрыманы ў Мар`інай Горцы (Менская вобласць), адпусцілі з міліцыі.
Як паведамляецца на сайце тэлеканала, машыну, якой кіраваў Баразенка, каля 9 гадзін спынілі супрацоўнікі ДАІ, нібыта каб праверыць, ці не знаходзіцца аўтамабіль ва ўгоне. Падазрэнні даішнікаў выклікаў vin-нумар машыны. Пасля затрымання тэлефон журналіста быў недаступны.
У Пухавіцкім РАУС у Мар`інай Горцы Баразенку пратрымалі тры гадзіны і каля 12 гадзін адпусцілі. Аўтамабіль таксама вярнулі, атрымаўшы тлумачэнні.
Варта зазначыць, што Аляксандра Баразенку затрымалі ў дзень яго нараджэння, сёння яму споўнілася 32 гады.
За апошнія дні ў шэрагу гарадоў Беларусі адбылося некалькі затрыманняў журналістаў, якія асвятлялі несанкцыянаваныя ўладамі акцыі.
Так, напярэдадні ў Глыбокім (Віцебская вобласць) быў затрыманы журналіст Зміцер Лупач, які супрацоўнічае з „Белсатам”. Ён прысутнічаў на сустрэчы з аўтарам youtube-канала „Краіна для жыцця” блогерам Сяргеем Ціханоўскім 31 сакавіка. Улады расцэньваюць вулічныя сходы прыхільнікаў Ціханоўскага як несанкцыянаваныя мерапрыемствы і пераследуюць іх удзельнікаў. Суд над Лупачом прызначаны на 11 мая.
У Магілёве быў затрыманы журналіст Аляксандр Буракоў, які супрацоўнічае з Deutsche welle, а таксама з`яўляецца праваабаронцам закрытага ўладамі цэнтра „Вясна”. Паводле неафіцыйнай інфармацыі, яго абвінавацілі ва ўдзеле ў несанкцыянаванай акцыі ў падтрымку Ціханоўскага 5 мая ў Магілёве.
Увечары 7 мая падчас акцыі канала „Краіна для жыцця” ў Магілёве затрымалі аператара-фрылансара Міхаіла Аршынскага.
* * *
У Беларусі працягваюцца затрыманні. Раніцай 9 траўня затрымалі аператара «Белсата» Аляксандра Баразенку. Пра гэта ён сам паведаміў рэдакцыі свайго тэлеканала а 8:49. Зараз Баразенка знаходзіцца ў Пухавіцкім РАУСе ў Марʼінай Горцы. Ягоны тэлефон недасяжны. Дзяжурны Пухавіцкага РАУСа сказаў, што ім даставілі нейкага чалавека, але пакуль ідзе разбіральніцтва і ён яшчэ не ведае прозвішчаў людзей. Прапанаваў патэлефанаваць праз гадзіну.
Беларускае Радыё Рацыя
Фота novychas.by
