Затрыманы старшыня БНФ Рыгор Кастусёў
Лідар Партыі БНФ Рыгор Кастусёў быў затрыманы па дарозе ў аэрапорт Менск-2, паведамляе сайт партыі БНФ. Ён збіраўся вылецець у Варшаву, дзе меў удзельнічаць у пасяджэнні міжнароднай камісіі польскага Сейма. Паплечнікі па партыі ведалі, што з дому выехаў, але ў Варшаве не з’явіўся. Тэлефон палітыка быў адключаны.
Увечары 3 ліпеня намеснік старшыні Партыі БНФ Аляксей Янукевіч паведаміў, што Рыгор Кастусёў знаходзіцца ў ІЧУ Менскага раёна. Затрымалі лідара БНФ, на думку Аляксея Янукевіча, за Курапацкую варту.
«Даведаліся, што ён не сеў на самалёт. Мы абзвоньвалі раённыя аддзелы міліцыі і зусім нядаўна атрымалі інфармацыю, вельмi абмежаваную, што спадар Кастусёў знаходзіцца ў ізалятары часовага ўтрымання Менскага раёна і што заўтра будзе суд», – распавёў Аляксей Янукевіч.
Калі і за што будуць судзіць лідара Партыі БНФ, на дадзены момант дакладна невядома. «Але відавочна, што калі затрыманне адбылося ў Менскім раёне, то судзіць могуць за ўдзел у акцыі супраць працы забаўляльнага комплексу ў Курапатах», – выказаў меркаванне Янукевіч. Паводле яго слоў, Кастусёў апошні час шмат разоў наведваў Курапаты, дзе больш за месяц доўжыцца грамадзянская акцыя пратэсту супраць працы забаўляльнай ўстановы ў месцах масавых расстрэлаў ахвяраў бальшавісцкіх рэпрэсіяў.
Аляксей Янукевіч таксама адзначыў, што пасяджэнне камісіі польскага Сейма, у якім планаваў удзельнічаць Кастусёў, не з’яўляецца экстраным: «Такія сустрэчы праходзяць рэгулярна, на іх абмяркоўваецца сітуацыя ў Беларусі. Але гэта досыць важнае мерапрыемства, на якім можна выказаць польскай палітычнай супольнасьці нашую пазіцыю і расставіць акцэнты», – дадаў намеснік старшыні Партыі БНФ.
На думку Аляксея Янукевіча, судовы працэс па справе старшыні Партыі БНФ Рыгора Кастусёва адбудзецца 4 ліпеня ў судзе Менскага раёна (г.Менск, вул. Маякоўскага, 119А).
Глядзіце таксама
