Завершаны збор подпісаў за бел-чырвона-белы сцяг
Ініцыятыва Змітра Дашкевіча сабрала звыш 10.000 подпісаў за бел-чырвона-белы сцяг.
Кампанія працягнулася з 19-га верасня па 19-га кастрычніка. Штодня, апроч нядзелі, палітык з невялікай групай актывістаў збірау у Менску подпісы каля выхадаў з прыпынкаў метро.
Менчукі падпісвалі зварот у Міністэрства культуры з патрабаваннем надаць бел-чырвона-беламу сцягу статус гісторыка-культурнай каштоўнасці.
“Яшчэ год таму цяжка было ўявіць, што сцяг будзе так вольна знаходзіцца ў грамаскіх месцах,” – гаворыць палітык Зміцер Дашкевіч:
– Вельмі многія задавалі пытанне: „А што, вас ужо не ганяюць за гэта, не закрываюць?” Гэта для людзей дзіва. Я думаю, яны таксама пераадольваюць страх і прызвычайваюцца да таго, што гэта нармальна. Калі ўвесь пераход завешаны бел-чырвона-беламі сцягамі – гэта нармальна. Людзі, думаю, ужо прывыклі.
“Можна смела сказаць, што сцяг выйшаў з зоны гета і падполля,” – дадаў Зміцер Дашкевіч. Праз некалькі дзён пасля фармальнай праверкі подпісаў Дашкевіч плануе перадаць подпісы ў Міністэрства культуры. Таксама цягам месяца звыш двух тысяч подпісаў было пастаўлена пад электронным зваротам у падтрымку сцяга.
Алесь Вайтовіч, Беларускае Радыё Рацыя
Фота svaboda.org
Глядзіце таксама
