Згодна перапісу, у Беларусі пражывае 9.413.446 чалавек (абноўлена)
Згодна са звесткамі перапісу насельніцтва, праведзенага восенню 2019 года, у Беларусі пражывае 9.413.446 чалавек, паведаміла старшыня Нацыянальнага статыстычнага камітэта (Белстат) Іна Мядзведзева на прэс-канферэнцыі пра першыя вынікі перапісу.
У сталіцы пражывае 2.018.281 чалавек, у Менскай вобласці — 1.471.240, у Берасцейскай — 1.348.115, Віцебскай — 1.135.731, Гомельскай — 1.388.512, Гарадзенскай — 1.026.816, Магілёўскай — 1.024.751.
З іх мужчын — 4.351.473 ад агульнай колькасці (46,2%), жанчын — 5.061.973 (53,8%).
Паводле слоў кіраўніка Белстата, „колькасць насельніцтва ў параўнанні з наяўным улікам зменшылася на 41 тысячу чалавек, або на 0,4%”. „Асноўная прычына — знешняя эміграцыя, — растлумачыла яна. — У прынцыпе гэта тычыцца тых людзей, якія працуюць больш за год за мяжой. Адпаведна, яны з’язджаюць з сем’ямі — мужамі, жонкамі, дзецьмі, якія застаюцца ў наяўным уліку. Але рэальна гэтыя людзі сёння ўжо пражываюць за мяжой”.
На думку Мядзведзевай, колькасць насельніцтва паводле вынікаў перапісу ў параўнанні з наяўным улікам „практычна не змянілася”. „Калі вы падніміце перапісы папярэдніх гадоў і паглядзіце, то там былі значна большыя разыходжанні ў лічбах”, — падкрэсліла яна.
„Калі паглядзець на размеркаванне колькасці насельніцтва па рэгіёнах, то мы бачым, што Мінск упэўнена пераадолеў двухмільённую мяжу. Пры гэтым Мінская вобласць таксама прырасла па колькасці насельніцтва. Пры падвядзенні вынікаў перапісу насельніцтва мы звярнулі ўвагу, што асноўны эфект у параўнанні з наяўным улікам прыпаў на міжрэспубліканскую міграцыю. Гэта значыць пяць рэгіёнаў у нас зменшыліся па колькасці насельніцтва, а Мінск і Мінская вобласць — павялічыліся. Фактычна насельніцтва пераязджае туды, дзе вышэйшыя даходы, лепшыя ўмовы пражывання”, — дадала Мядзведзева.
Старшыня Белстата адзначыла, што даныя аб колькасці насельніцтва Беларусі — канчатковыя. Да 1 верасня будуць апрацаваныя і атрыманыя вынікі па сацыяльна-дэмаграфічных характарыстыках насельніцтва. Апрацоўка звестак будзе доўжыцца да ліпеня 2021 года.
У перапісе ўзяло ўдзел 95% насельніцтва. 22% рэспандэнтаў зрабілі гэта праз інтэрнэт, 28% — на мабільных і стацыянарных участках, 48% — падчас абходаў дамоў, 2% ад перапісу адмовіліся.
belapan.by
