Жыхара Баранавічаў асудзілі на чатыры гады за „распальванне варожасці”
Сёмага чэрвеня ў Берасцейскім абласным судзе абвясцілі прысуд жыхару Баранавічаў Уладзіславу Бурыну па крымінальнай справе аб распальванні варожасці, паведамляе „Берасцейкая Вясна”. Суддзя Мікалай Сянько прызнаў яго вінаватым па ч. 1 арт. 130 КК РБ і прызначыў пакаранне ў выглядзе 3 гадоў пазбаўлення волі (столькі і запытвала дзяржабвінаваўца Бялт). З улікам неадбытай часткі пакарання па іншым прысудзе (ён быў раней асуджаны за махлярства), сумарнае пакаранне будзе складаць чатыры гады калоніі ўзмоцненага рэжыму.
Паводле абвінавачання, з 20 па 27 верасня 2020 года ў тэлеграм-чаце групы „Карнікі” мужчына размясціў 13 паведамленняў, у якіх, згодна з лінгівістычнай і псіхалагічнай экспертызамі, „негатыўна ацаніў” і „падахвочваў да незаконных крымінальных дзеянняў” у дачыненні да супрацоўнікаў міліцыі, вайскоўцаў, дзяржаўных служачых і іх сем’яў.
На судзе паведамленні цалкам не зачытваліся, але ў некаторых было параўнанне ўкраінскіх пратэстаў і беларускіх. Частка паведамленняў былі рэпостамі.
Абвінавачаны Бурын на судзе заявіў, што прызнае віну цалкам. Пры гэтым адзначыў, што частку паведамленняў ён не напісаў сам, а толькі пераслаў гатовае. Таксама мужчына выдаліў свае паведамленні з чатаў праз два тыдні — „зразумеў, што няправільна напісаў”, скінуў тэлефон да завадскіх наладаў.
Бурын знаходзіцца пад вартай з восьмага лютага.
