З’явіўся сайт, прысвечаны гісторыі сталінскіх рэпрэсій у Віцебскім рэгіёне
Стварэннем сайта займаліся актывісты ініцыятывы “Хайсы- віцебскія Курапаты”, якая ладзіць імпрэзы па ўшанаванні памяці ахвяраў сталінізму ў рэгіёне.
Кіраўнік ініцыятывы Ян Дзяржаўцаў лічыць, што пра трагічныя падзеі павінны ведаць як мага болей людзей:
– Пасля вайны адбыўся Нюрнбергскі трыбунал, а над бальшавікамі такога трыбуналу не адбылося. І мы хочам давесці людзям аб тых злачынствах – аб камуністычным тэроры – каб людзі пра гэта ведалі і ніколі не забывалі.
Адзін з раздзелаў сайта прысвечаны ўспамінам відавочцаў так званых “сталінскіх расстрэлаў” у ваколіцах Віцебска. Удзельнікі ініцыятывы сабралі больш за 30 такіх аповедаў вяскоўцаў- старажылаў або ўжо іхніх нашчадкаў.
Таксама на сайце “Віцебскія Курапаты” можна знайсці звесткі і пра дзейнасць актывістаў, кажа ўдзельнік ініцыятывы Аляксей Прохараў:
– Па-першае, агульная інфармацыя пра нашу ініцыятыву – як усё стваралася-пачыналася, таксама пра месцы расстрэлаў і мемарыялы. І ёсць звесткі пра рэпрэсаваных па раёнах: кожны можа прагледзець спісы па нейкім раёне і пашукаць сваіх сваякоў.
Над матэрыяламі для сайта “Віцебскія Курапаты” працуюць мясцовыя краязнаўцы і журналісты. Таксама ўдзельнікі ініцыятывы спадзяюцца, што інтэрнэт-рэсурс дапаможа ім са зваротнай сувяззю – што сваімі сямейнымі гісторыямі з імі падзеляцца і наведнікі сайта.
Беларускае Радыё Рацыя, Віцебск
Глядзіце таксама
