Абвешчаны поўны спіс прэміі Арсенневай
У поўны спіс сёлетняй прэміі імя Наталлі Арсенневай за найлепшую кнігу паэзіі ўвайшло 19 кніг.
Да ўдзелу ў конкурсе прымаліся паэтычныя кнігі на беларускай мове, выдадзеныя ў 2019 годзе. Таксама прымаліся кнігі 2018 года, пры ўмове, што яны не былі пададзеныя на прэмію ў мінулым годзе.
Сёлета на прэміі Арсенневай прадстаўлены восем беларускіх і адно польскае выдавецтва.
Лідарам па колькасці намінантаў з’яўляецца выдавецтва “Галіяфы” – шэсць кніг, выдавецтва “Кнігазбор”
Поўны спіс намінантаў на прэмію імя Наталлі Арсенневай:
Валянціна Аксак “Кава ў арліным гнязьдзе”. Выдавецтва “Кнігазбор”, Мінск.
Аляксандр Арцішэўскі “Тарнова”. Выдавецтва “Галіяфы”, Мінск.
Яўген Аснарэўскі “Сакавіцкія Зайцы”. Выдавецтва “Палiграфiкс”, Гродна.
Генадзь Аўласенка “Паэзія без габарытаў”. Выдавецтва “Чатыры чвэрці”, Мінск.
Крысціна Бандурына “HOMO”. Выдавецтва “Галіяфы”, Мінск.
Данута Бічэль-Загнетава “Гускі вяртаюцца”. Выдавецтва “ЮрСаПрынт”, Гродна.
Святлана Варонік “Пацеркі даверу”. Выдавецтва “Кнігазбор”, Мінск.
Цемрык Велет “Злом”. Выдавецтва “Галіяфы”, Мінск.
Вольга Гапеева “Чорныя макі”. Выдавецтва “Галіяфы”, Мінск.
Павел Данілаў “Крыгаход душы”. Выдавецтва “Кнігазбор”, Мінск.
Ігар Кулікоў “Храм ракі”. Выдавецтва “Янушкевіч”, Мінск.
Нiна Лiстота “Запрашэнне”. Выдавецтва “Янушкевiч”, Мiнск.
Вераніка Луня “Табе. І толькі Табе”. Выдавецтва “Чатыры чвэрці”, Мінск.
Павел Міхалькевіч “Чорная архідэя”. Выдавецтва “Галіяфы”, Мінск.
Вольга Нікіценка “Сузор’е птушкі”. Выдавецтва “МІНКОПРЫНТ”, Мінск.
Ігар Сідарук “Непазьбежны лістапад”. Выдавецкая ініцыятыва “Полацкае ляда” пры ўдзеле беластоцкага выдавецтва “Ekopress”, Полацк-Беласток.
Таццяна Тамілава “Феі”. Выдавецтва “Галіяфы”, Мінск.
Андрэй Хадановіч “Школа травы”. Выдавецтва “Кнігазбор”, Мінск.
Юрась Шамецька “Непрадказальнае”. Выдавецтва “Кнігазбор”, Мінск.
У журы прэміі Наталлі Арсенневай сёлета ўвайшлі: паэт і загадчык літаратурнага музея Максіма Багдановіча Міхаіл Бараноўскі, паэтка, перакладчыца, кандыдат філалагічных навук, выкладчыца сусветнай літаратуры Вольга Гронская, паэт, літаратуразнаўца, архівіст, кандыдат філалагічных навук Віктар Жыбуль, літаратуразнаўца, доктар філалагічных навук, выкладчыца Анжэла Мельнікава, паэтка, бард, выкладчыца беларускай мовы і літаратуры Лера Сом.
Літаратурная прэмія імя Наталлі Арсенневай ушаноўвае аўтара ці аўтарку найлепшай паэтычнай кнігі на беларускай мове. Арганізатары прэміі: Беларускі ПЭН-цэнтр, ГА “Саюз беларускіх пісьменнікаў” і Згуртаванне беларусаў свету “Бацькаўшчына”. Узнагарода ўручаецца пры падтрымцы Фонда культуры і адукацыі Орса-Рамана і Харытатыўнага фонда Згуртавання беларусаў Вялікай Брытаніі.
Прэмія заснаваная ў гонар беларускай паэткі Наталлі Арсенневай (1903—1997) у 2017 годзе і ўручаецца за найлепшую паэтычную кнігу на беларускай мове. Лаўрэатамі прэміі былі Уладзімір Някляеў за зборнік паэзіі “Толькі вершы”, Алесь Разанаў за кнігу “Перавыбранае” і Марыя Мартысевіч за кнігу “Сарматыя”.
