Абвешчаны спіс намінантаў на прэмію «Дэбют»
Журы прэміі «Дэбют» імя Максіма Багдановіча агучыла доўгі спіс намінантаў на прэмію. У яго ўвашлі 17 кніг ў трох намінацыях – проза, паэзія, пераклады. Сёлета журы надзвычай цяжка будзе вызначыць пераможцаў, асабліва ў намінацыі проза. Яўнымі фаварытамі тут з’яўляюцца кнігі Андруся Горвата «Радзіва Прудок» і Уладзіміра Садоўскага «1813». Кніга Горвата разышлася за лічаныя дні, за ёй стаялі чэргі. Але і кніга Садоўскага лічыцца бэстсэлерам. Кажа яе выдавец – Андрэй Янушкевіч:
– Кніга Садоўскага “1813” – наш леташні бэстсэлер на kniharnia.by. Гэта кніга пазіцыянуецца як першы беларускі зомбі-хорар. Яна была выдадзена ў лістападзе толькі ў электронным выглядзе. Але прайшло літаральна тры месяцы, як мы ўбачылі вельмі вялікі інтарэс да кнігі. І вырашылі выдаць гэтую аповесць на паперы.
Пераможцы прэміі «Дэбют» у кожнай з намінацый атрымаюць чэк ад Фонду «Вяртанне» на суму, эквівалентную 2 тыс. даляраў. Таксама журы можа прыняць рашэнне пра ўручэнне заахвочвальных прызоў.
Проза
Андрэй Дзічэнка. Сонечны чалавек. — Мінск: Выдавец А.М. Янушкевіч
Уладзь Гарбацкі. Песьні тралейбусных рагуляў. — belarusians.co.uk
Андрусь Горват. Дзённік «Радзіва Прудок». — Мінск: Медысонт
Яніна Пінчук. Горад мрой. — Мінск: Галіяфы
Уладзімір Садоўскі. 1813. — Мінск: Выдавец А.М. Янушкевіч
Паэзія
Аляксей Арцёмаў. Скрозь кіламетры. — Мінск: Кнігазбор
Міхал Бараноўскі. VOLUMEN 1. — Мінск: Кнігазбор
Марыя Бельская. Таямніца. — Мінск: Харвест
Ганна Галавіна. Яблык Зямля. — Мінск: Галіяфы
Ганна Комар. Страх вышыні. — Мінск: Кнігазбор
Ганна Федарук. Падглядаю ваш сон. — Мінск: Харвест
Пераклад
Дар’я Вашкевіч (пер. з ангельскай): Ніл Гейман. Караліна. — Мінск: Выдавец Зміцер Колас
Алесь Емяльянаў-Шыловіч (пер. з польскай): Галіна Пасвятоўска. Ідалапаклонніца. — Мінск: Кнігазбор
Яўгенія Гарунова, Наста Варашыліна (пер. са шведскай): Оса Ліндэрборг. Я не належу нікому. — Брэст: Альтэрнатыва
Адэля Дубавец (пер. з польскай): Вітальд Шаблоўскі. Танец мядзведзяў. — 34mag.net, электроннае выданне
Надзея Кім (пер. з ангельскай): Клайв Стэйплз Льюіс. Хронікі Нарніі: пляменнік чараўніка. — Мінск: Пазітыў-цэнтр
Сюзанна Паўкштэла (пер. з літоўскай): Альвідас Шляпікас. Бог дажджу. — Вільня: Логвінаў
Васіль Кроква, Беларускае Радыё Рацыя
