Акудовіч у Гародні
Пасля выступу на мерапрыемствах XIX Трыялогу ў Крынках беларускі філосаф Валянцін Акудовіч завітаў у Гародню, дзе ў прасторы “Цудоўня” адбылася сустрэча з гарадзенцамі.
На сустрэчы філосаф падзяліўся сваімі думкамі пра сучаснае мысленне і прывёў прыклады з асабістага жыцця, звязаныя з філасофіяй.
Кажа Валянцін Акудовіч:
– Было нечакана. І гэтым адметна. Па-другое, пазнаёміўся проста з цудоўнымі людзьмі. Па-трэцяе, прынамсі, былі зацікаўленыя, бо ніхто не сыходзіў. Я думаю, у Гародні бясспрэчна ёсць інтэлектуальны патэнцыял. І я проста чакаю, што акрамя знакамітых музыкаў, як мой любімы Шалкевіч, гісторыкаў, з’явяцца і мысліўцы.
Для арганізатара сустрэчы Андрэя Несцяровіча Валянцін Акудовіч – адзін са стваральнікаў нацыянальнай ідэі.
– Акудовіч – адзін з кітоў беларускай сучаснай філасофіі. Гэта адзін з прадстаўнікоў беларускага сучаснага мыслення. Глыбокага, прадуманага і ўсвядомленага. Асоба, якая ў прынцыпе спрычынілася да фармавання ў тым ліку і нацыянальнай беларускай ідэі. Сустрэчы і размовы з такімі людзьмі дазваляюць больш-меньш шырокім колам грамадства ўсвядоміць што ёсць што, задацца пытаннямі. Філасофія, у прынцыпе, гэта пытанні і пошук адказаў на гэтыя пытанні.
Цягам бліжэйшага месяца ў гарадзенскай “Цудоўні” пройдзе цэлы шэраг сустрэчаў з беларускімі філосафамі ды мысліўцамі. Наступным госцем будзе Уладзімір Мацкевіч.
Беларускае Радыё Рацыя, Гародня
Глядзіце таксама
