Алена Анісім: Роднае слова заўсёды дапамагала ў складаныя часы
Старшыня Таварыства беларускай мовы распавяла пра тое, як пройдзе ў Беларусі Міжнародны дзень роднай мовы.
Алена Анісім: Таварыства беларускай мовы будзе праводзіць традыцыйную дыктоўку 21 лютага ў 11.00 гадзін у сваёй сядзібе па вуліцы Румянцава, 13. Мы запрашаем усіх сяброў ТБМ і прыхільнікаў беларускага слова. Безумоўна, спадзяемся, што прыйдзе моладзь.
Адным словам, урачыстую дыктоўку рыхтуем менавіта ў Міжнародны дзень роднай мовы.
РР: Якія яшчэ мерапрыемствы будзеце праводзіць з гэтай нагоды?
Алена Анісім: Яны будуць праходзіць штодзень. Напрыклад, 22 лютага ў бібліятэцы Акадэміі навук адбудзецца прэзентацыя зборніка з матэрыяламі канферэнцыі “Нашы вякі – наша багацце. Лепшыя практыкі менеджменту спадчыны”. Гэта такі грунтоўны зборнік там ёсць даволі цікавыя матэрыялы.
У навуковай бібліятэцы імя Якуба Коласа выступяць таксама з прамовамі навукоўцы, грамадскія дзеячы, музыканты. Трэба дадаць, што многія нашы рэгіянальныя арганізацыі таксама на месцах рыхтуюць свае мерапрыемствы. Гэта будуць і дыктоўкі, і сустрэчы з цікавымі людзьмі – бардамі, пісьменнікамі…
РР: Часы зараз няпростыя, усё нацыянальнае стараюцца прэсаваць…
Алена Анісім: Часы няпростыя, але пра мову не варта забываць ніколі. Роднае слова дапамагала ў часы самых складаных ліхалеццяў. Яно павінна дапамагчы нам і зараз.
Кастусь Заблоцкі, Беларускае Радыё Рацыя
Глядзіце таксама
