Арыгіналы і факсіміле першадрукаваных кніг – на выставе ў НББ
Арыгіналы і факсіміле першадрукаваных кніг ХV-XVII стагоддзяў з сямі краін будуць экспанавацца на міжнароднай выстаўцы „Францыск Скарына і яго эпоха”, прысвечанай 500-годдзю беларускага кнігадрукавання ў Нацыянальнай бібліятэцы Беларусі.
Выстава „Францыск Скарына і яго эпоха” пераносіць на 500 гадоў таму, у тыя часы, калі кнігадрукаванне толькі зараджалася: з’явіліся першыя друкарскія станкі, а прывычныя руцэ перапісчыка пяро і чарніліца адышлі на другі план. У справе кнігадрукавання ў многіх краін свае героі: Іван Фёдараў – у Расеі, Прымаж Трубар – у Славеніі, Уільям Кекстан – у Англіі. У Беларусі, вядома ж, Францыск Скарына.
У экспазіцыі сабраны арыгіналы і факсіміле першадрукаваных кніг ХV-XVII стагоддзяў, прывезеныя з Германіі, Латвіі, Польшчы, Расеі, Славакіі і Славеніі. Экспанаты ўражваюць, у прыватнасці з Германіі прыехала 42-радковая Біблія Іагана Гутэнберга 1450-х гадоў. Цэнтральнае месца адведзена арыгінальным выданням Францыска Скарыны з фондаў Нацыянальнай бібліятэкі Беларусі, якія ўбачылі свет у Празе і Вільні ў 1517-1525 гадах.
На выставе можна шмат што даведацца аб першадрукару Францыску Скарыну. На „Кінапляцоўцы” ў рэжыме нон-стоп будуць трансліравацца фільмы аб ім, прадстаўлена падборка кніг для аўдыторыі розных узростаў. Наведвальнікі змогуць перанесціся ў друкарскую майстэрню XVI стагоддзя пры дапамозе шлема віртуальнай рэальнасці, а таксама атрымаюць магчымасць папрацаваць за ўзноўленым друкарскім станком Францыска Скарыны і параўнаць з працэсам на сучасным станку і 3D-прынтары.
Урачыстае адкрыццё выстаўкі адбудзецца 14 верасня, а для наведвальнікаў экспазіцыя стане даступная з 15 верасня і будзе працаваць да 31 снежня. Яе арганізатарамі выступаюць Міністэрства культуры і Нацыянальная бібліятэка Беларусі.
