Барыс Пятровіч прэзентаваў „Пуціну” ў кнігарні „Логвінаў”
У Менску адбылася прэзентацыя новай кнігі пісьменніка, старшыні Саюза беларускіх пісьменнікаў Барыса Пятровіча „Пуціна”. Па словах самаго аўтара, агулам у яго выйшла 10 кніг, але толькі гэтую ён прадставіў чытачам асабіста, на адмысловай прэзентацыі. Гэта зроблена для таго, каб сабраць сродкі для падтрымкі кнігарні „Логвінаў”, якая апынулася на мяжы закрыцця з-за велізарных штрафаў, накладзеных інспекцыяй па падатках і зборах Цэнтральнага раёну Менска.
– Прапанавалі паўдзельнічаць у марафоне падтрымкі кнігарні “Логвінаў”, якая сапраўды вельмі шмат робіць дзеля беларускай літаратуры, дзеля беларускай культуры, дзеля беларускай мовы. Падтрымаць кнігарню – гэта наш абавязак, бо фактычна мы летась страцілі кнігарню “Галіяфы”, яшчэ адну беларускую кнігарню, на мяжы страты кнігарня “Логвінаў”, але нашымі намаганнямі, нашымі высілкамі мы можам захаваць яе.
У кнігу ўвайшлі 2 аповесці – „Стах” і „Пуціна”. Яны ўжо выдаваліся раней. Але, па словах Барыса Пятровіча, прайшлі нібыта незаўважанымі. Калі ж ён зараз перагледзеў іх, то падалося, што творы актуальныя і сёння.
На прэзентацыі кнігі выступілі беларускія пісьменнікі, журналісты, музыканты. Сярод іх былі Сяргей Законнікаў, Андрэй Федарэнка, Людміла Рублеўская, Алесь Пашкевіч, Сяргей Дубавец, Алесь Камоцкі і іншыя.
Генадзь Барбарыч, Беларускае Радыё Рацыя.
Фота Алены Казловай
Глядзіце таксама
