Беларуская дыктоўка ў Мінойтах
15-я Агульнанацыянальная дыктоўка на Лідчыне, па добрай старой традыцыі, пачалася з вёскі Мінойты.
19 лютага ў мясцовай бібліятэцы сабраліся тутэйшыя жыхары, прыехалі з Ліды рэдактар газеты “Наша слова.pdf” і часопіса “Лідскі летапісец” Станіслаў Суднік, а таксама лідскі бард Сяржук Чарняк.
Пісалі тэкст дыктоўкі па ўспамінах паэта Анатоля Іверса “Ён адкрыў мне Беларусь” пра Янку Купалу, у тым ліку і пра прыезд народнага песняра ў Ліду ў 1940 годзе.
Чытала тэкст былы бібліятэкар Мінойтаўскай бібліятэкі Марыя Бойка. Праверку напісанага праводзілі ў рэжыме самакантролю.
Пасля напісання дыктоўкі, з беларускім песенным рэпертуарам выступіў Сяржук Чарняк.
Усе жыхары Мінойтаў, хто прымаў удзел у напісанні дыктоўкі, атрымалі па тры нумары “Лідскага летапісца” розных гадоў.
Сёння, 20 лютага, дыктоўку на Лідчыне напішуць у трэцяй гарадской бібліятэцы і ў Доме-музеі Валянціна Таўлая, а таксама ў і іншых месцах. А ў асноўны дзень, 21-га лютага, 15-ю Агульнанацыянальную беларускую дыктоўку будуць пісаць у многіх гарадах і вёсках Беларусі.
Аксана Шпак, Беларускае Радыё Рацыя, Лідскі раён
Фота аўтара
