Дні культуры Украіны пройдуць 5-10 ліпеня ў Беларусі
Афіцыйную дэлегацыю Украіны ўзначальвае дзяржаўны сакратар Міністэрства культуры Украіны Расціслаў Карандзеяў. Урачыстае адкрыццё Дзён культуры адбудзецца 5 ліпеня ў Менску ў Палацы Рэспублікі.
На яго сцэне выступяць Нацыянальны заслужаны акадэмічны ансамбль танца Украіны імя. П.Вірскага, папулярныя эстрадныя выканаўцы Іво Бобул, Ленара Асманава, Злата Агневіч, Ціна Кароль, Алег Віннік, групы Luiku і „Гетман”.
У фае Палаца Рэспублікі будзе экспанавацца выстава народных промыслаў.
Вялікая канцэртная праграма з удзелам папулярных артыстаў з Украіны стане ў гэтым годзе адной з адметных асаблівасцяў свята „Купалле”. Так, 7 ліпеня на фестывалі можна будзе азнаёміцца з нацыянальнай кухняй і работамі майстроў народнай творчасці Украіны: кавалёў, ганчароў, кабзароў, керамістаў, бандурыстаў, вытворцаў лялек-выцінанак. На наступны дзень, 8 ліпеня, запланаваны паказ коннага тэатралізаванага шоу „Кіеўская Русь”, канцэрт Дзён культуры Украіны – у Александрыі на галоўнай сцэнічнай пляцоўцы выступяць артысты і творчыя калектывы.
Насычаную праграму ўкраінскія артысты прадставяць таксама 10 ліпеня на сцэне Гомельскага грамадска-культурнага цэнтра.
