Дзень народзінаў Шагала – свята ўсіх вольных мастакоў
7 ліпеня ў Віцебску адзначылі 132-я ўгодкі славутага земляка.
Паводле традыцыі, святкаванне пад назовам “У гасцях у Марка і Бэлы” прайшло ў дворыку музею Марка Шагала на Пакроўскай вуліцы. Музей месціцца ў доме, дзе калісьці жыла сям’я Шагалаў, і дзень народзінаў мастака тут заўжды святкуюць весела і па-сямейнаму, кажа дырэктарка музею Ірына Воранава:
– Нарадзіўся ён з 6-га на 7-га, уначы. І мы спачатку адзначалі 6-га ліпеня, а потым прыехала ўнучка і распавяла, што ў сям’і адзначаюць 7-га. Тады і музей, і горад пачалі адзначаць 7-га ліпеня. Гэта канцэрты, прадстаўленні танцавальныя, цыркавыя , тэатральныя – самыя разнастайныя.
Традыцыя адзначаць угодкі мастака вядзецца з часу адкрыцця музея. Ён адчыніўся ў 1997-м годзе, да 110-годдзя Марка Шагала. На думку старшыні віцебскай арганізацыі Беларускага саюзу мастакоў Святланы Баранкоўскай, дзень народзінаў мэтра – гэта свята ўсіх, хто займаецца выяўленчым мастацтвам:
– Для мастакоў гэтае свята нават большае, чымсьці Дзень незалежнасці для Рэспублікі Беларусь. Бо гэта свята свабоды творчасці і веры ў тое, што мастак можа быць прызнаным не толькі ў сябе, у сваёй правінцыі, але можа быць прызнаным ва ўсім свеце, і вярнуцца славутасцю да сябе на Радзіму.
Цалкам рэпартаж слухайце ў далучаным файле:
Сёлета ў дворыку музею Марка Шагала выступаў самадзейны калектыў “Віцебскія дзяўчаты”. Назва калектыву гумарыстычная: у ім займаюцца як жанчыны, так і мужчыны, прычым сталага веку. Але іхнаму імпэту могуць пазайздросціць і нашмат маладзейшыя, бо габрэйскія танцы і песні яны выконваюць весела і з вялікім энтузіязмам. Што да планаў на будучыню, то ёсць ідэя заснаваць і праводзіць у Віцебску на ўгодкі Марка Шагала фестываль клезмерскіх калектываў – выканаўцаў габрэйскай народнай музыкі.
Ганна Ліпка, Беларускае Радыё Рацыя
