Фэст „Аршанская бітва” аднаўляецца?
На Крапівенскім полі, што ў раёне вёскі Гацькаўшчына Аршанскага раёна, адбыліся святкаванні 504-х угодкаў вялікай Аршанскай бітвы. Сёлета ўпершыню з 2007-га году беларускіх патрыётаў не затрымлівала і не правярала міліцыя, што дазволіла пранесці на поле гукаўзмацняльную апаратуру. На наступны год магчымае аднаўленне фэсту запачаткаванага яшчэ ў 1992 годзе.
Старшыня Таварыства беларускай мовы Воршы Юрый Нагорны кажа, што арганізатары разглядаюць магчымасць перамоваў з уладамі наконт фэсту:
– Гэта першы год, скажу шчыра, калі не было ніякай міліцыі, нават і ноччу не прыязджала. Пэўна яшчэ па старой, як кажуць, інерцыі. Думалі будуць ганяць, таму баяліся ехаць. Можа на наступны год традыцыя адновіцца. Трэба нейкім чынам папулярна, таму ж старшыні калгаса, брыгадзіру, механізатару, трактарысту, каб ён прачытаў і ўбачыў, што гэта можа быць яго прадзед далёкі быў тут. Таму вырашылі нейкую адукацыйную праграмку, на наступны год гэта зробім абавязкова.
Бардаўскі фэст „Аршанская бітва” праводзіўся на самым Крапівенскім полі з 1992 года. На яго прыязджалі ўдзельнікі з усёй Беларусі, а таксама з-за мяжы.
Кастусь Багушэвіч, Беларускае Радыё Рацыя
Фота orsha.eu
