Фэст „Жнівень” запрашае на Лепельшчыну
На фэст „Жнівень” запрашае тых, хто цікавіцца беларускай культурай і традыцыямі, уладальнік аграсядзібы ў Вялікім Поўсвіжы, што на Лепельшчыне, Васіль Шкіндзер.
Ён разам са сваімі сябрамі ладзіць яго ўжо пяты год запар.
Паводле Васіля Шкіндзера, ідэю правядзення падобных фэстаў яны падгледзелі ў Браславе, калі завіталі туды на рамесніцкі фэст некалькі год таму:
– Такі невялічкі фестываль робяць на тэрыторыі музейнай часткі, тэрыторыя як наша. Яны запрашаюць рамеснікаў, мастакоў, а таксама музыкаў. Мы паміж сабой паразмаўлялі, што ў нас музыкаў, мастакоў, рамеснікаў досыць багата, а мы тут спім у шапку. Праўда мы даўно думалі, але магчымасць з’явілася толькі тады, калі я заняўся агратурызмам і ў нас з’явілася тэрыторыя, куды можна запрасіць людзей.
У межах фэсту адбудзецца выстава-продаж рамесных вырабаў майстроў Віцебскай вобласці, майстар-класы па працы з саломкай і сярэднявечных танцах. Таксама прысутныя пазнаёмяцца са жніўным абрадам і навучацца пячы хлеб з мукі ручнога памолу. Мерапрыемства адбудзецца 22 жніўня.
Таццяна Смоткіна, Беларускае Радыё Рацыя
