Фестываль аўтарскай рок-музыкі правядуць 30.06 – 2.07 у Браславе
На фестываль аўтарскай рок-музыкі „Магутны Фэст 2018” у Браслаў з 30 чэрвеня па 2 ліпеня з’едуцца каля 2 тыс. гледачоў.
Тры летнія дні на пляжы горада будзе праходзіць другі open-air фестываль „Магутны Фэст”. Форум адкрыты як для пачынаючых калектываў, так і для мэтраў рок-сцэны. Яго мэта – сабраць у адным месцы лепшых прадстаўнікоў аўтарскай рок-музыкі. „За фестывальныя дні гледачы пачуюць амаль 30 груп, якія выконваюць уласныя песні. Большасць з іх беларускія музыканты, але прыедуць два калектывы з Расеі, а спецыяльным госцем стане італьянская Anthropos”, – расказалі арганізатары.
У час фестывалю меламаны змогуць не толькі атрымаць асалоду ад жывой музыкі, але і адпачыць на пляжы, пракаціцца на маторных лодках. Будуць працаваць фудкорты, а ўдзельнікі клуба рэгбі „Унія” правядуць майстар-клас па гэтым відзе спорту.
У параўнанні з мінулым годам запланавана больш забаўляльных пляцовак, інтэрактыўных мерапрыемстваў і конкурсаў, якія ўзнімуць настрой перад пачаткам канцэртнай часткі. Дзённая праграма спадабаецца і аматарам актыўнага адпачынку, і жадаючым пашырыць свой музычны кругагляд. Не расчаруе яна і тых, хто наогул не збіраецца спаць і з раніцы будзе гатовы да рок-н-рольнага адрыву.
Удзельнікі фестывалю змогуць размясціцца не толькі пад дахам дома або гасцініцы, але і ўстанавіць палаткі каля сцэны. Акрамя таго, на працягу трох дзён у гасцей форуму будзе магчымасць азнаёміцца з гісторыяй і прыродай Браслаўскага краю, паглядзець мясцовыя славутасці.
Арганізатарам форуму выступіла студыя гуказапісу „9” пры падтрымцы аднаго з браслаўскіх кафэ.
