Што чакае гасцей першага “Фэсту Уладзіміра Караткевіча”?
Фэст адбудзецца 30-га лістапада, яго арганізатарамі з’яўляюцца беларускі ПЭН-Цэнтр і аршанская філія Таварыства беларускай мовы імя Францішка Скарыны.
Паводле кіраўніка філіі Юрыя Нагорнага, ідэя правесці фэст у Воршы, на малой радзіме Уладзіміра Караткевіча, з’явілася ўжо некалькі гадоў таму:
– Мы даўно хочам зрабіць фэст, варты імені нашага класіка, каб прыехалі ўсе ахвотныя з Менску, Віцебску, Гародні і гэтак далей. У гэтым годзе мы паглядзім, якія ў нас ёсць праблемы. І фэст 30-га лістапада будзе як рэпетыцыя перад тым вялікім фэстам, які мы плануем зрабіць на наступны год – у год 90-годдзя Уладзіміра Сямёнавіча.
Сёлетні фэст будзе вандроўны: ён распачнецца з экскурсіі па мястэчку Смаляны, а завершыцца ў Воршы, кажа прадстаўніца ПЭН-Цэнтру, пісьменніца Паліна Качаткова (Сцепаненка):
– За ўзор для гэтага фестывалю мы ўзялі літаратурны фестываль “Бязмежжа”, які шмат гадоў праводзіцца на Беласточчыне. Ворша, як і Беласток, – гэта памежны горад, апошні буйны горад на мяжы з Расеяй, і вельмі важна пазначыць тут культурныя межы беларускія.
У праграме фэсту – вандроўка па Смалянах з каязнаўцам Віктарам Мяжэвічам, экскурсія па аршанскіх мясцінах, звязаных з асобай Уладзіміра Караткевіча, у тым ліку наведванне бацькоўскай хаты пісьменніка з ласкавай згоды яе цяперашняга ўласніка, бізнесмена Андрэя Балабіна.
Завершыцца фестываль канцэртам Сержука Доўгушава, у якім прагучаць песні на вершы Караткевіча.
Ганна Ліпка, Беларускае Радыё Рацыя
Глядзіце таксама
