Гародня: выстава праекта „Галерэі, якіх няма”
У адной з незалежных пляцовак адбылася ўнікальная выстава аднаго дня. Гарадзенцам у віртуальнай рэальнасці паказалі праект „Галерэі, якіх няма”.
Пра асаблівасці гэтага праекта распавядае адна з яго стваральніц Ірына Варкулевіч:
– У гэтай віртуальнай рэальнасці, якая нам дапамагае паказываць клуб „VRGRODNOCLUB”, 10 мастакоў. Двое з Літвы – з Алітуса і Коўна. Нашыя гарадзенскія мастакі – 8 чалавек. Мы зрабілі дзесяць панарам. Вы можаце знаходзіцца ўнутры панарамы, як быццам рэальна стаіце не вуліцы і глядзіце на ўсе сцены. Адзінае, глядзіце вы быццам з пазіцыі, як кажа наш Сяргей Грыневіч, што ён заўсёды любіць маляваць з пазіцыі мышы, вы глядзіце з пазіцыі мухі.
Па словах Вольгі Акрымовіч, прадстаўніцы клуба віртуальнай рэальнасці – гэта першая спроба супрацы з мастакамі:
– Хочам паказаць жыхарам горада Гародні, як могуць узаемадзейнічаць тэхналогіі разам з сучасным мастацтвам. Мы хочам развіваць віртуальную рэальнасць не толькі, як гульнявую індустрыю, нейкую забаўляльную, але і карысную ў плане медыцыны, мастацтва, каб паказаць, што ў віртуальнай рэальнасці бязмежныя магчымасці.
На выставе можна было пабачыць частку прац гарадзенскіх мастакоў.
Выставу наведала больш за сотню гарадзенцаў.
Беларускае Радыё Рацыя, Гародня
Фота Сяргея Апановіча
