Гурт PET NIHIL прадставіў неафіцыйную версію кліпа „Вырадак”
Музыка і лідар гарадзенскага гурта PET NIHIL Юрый Лакціёнаў прадставіў на YouTube альтэрнатыўную версію кліпа на песню «Вырадак». Музычны шэраг песні гурта накладзены на кадры, знятыя ў час спробы рэжыму Януковіча падавіць пратэстныя настроі ўкраінскага народа, і прысвячаецца ўдзельнікам Еўрамайдана, якія загінулі за свабоду Украіны. Ідэя кліпа належыць вакалісту гурта і журналісту Аляксандру Баразенку, які стаў сведкам падзей на Украіне.
Расказвае Юры Лакціёнаў:
– Украіна, таму што я нарадзіўся ва Украіне. Адбывалася гэта на пачатку Майдана, і калі пачаліся ўсе гэтыя спробы рэжыму Януковіча падавіць пратэстныя настроі, і тое, што зараз адбываецца на паўднёвым усходзе краіны – мне гэта не абыякава. Таму што Украіна – мая радзіма. Аднак мы ўзялі толькі кадры з Майдана, то бок не сталі браць паўднёвы усход, таму што атрымаўся б кліп вельмі шырокі. Таму толькі Майдан. І гэты рэмэйк – гэта не афіцыйная работа групы.
Кліп на песню «Вырадак» гэта першае афіцыйнае відэа гарадзенскага альтэрнатыўнага гурта PETNIHIL. Зараз музыкі працуюць над падрыхтоўкай матэрыялу для новага альбома, выхад якога запланаваны на 15 годдзе калектыву ў наступным годзе.
Беларускае Радыё Рацыя, Гародня
