Ігар Мельнікаў: верасень 1939 у Беларусі не ўзгадваюць
Гісторык Ігар Мельнікаў прадставіў у Гародні кнігу «Верасень 1939. Магілы «неаб’яўленай» вайны«. Унікальнае кніга-альбом выйшла невялікім накладам у 100 асобнікаў.
Пра кнігу распавядае Ігар Мельнікаў:
– Гэта вынік вялікай працы. Апошнія пяць гадоў збіралі матэрыялы я і мае калегі з групы вайсковай гістарычнай рэканструкцыі беларусаў у войску польскім. Матэрыялы пра жаўнерскія пахаванні на даваеннай савецка-польскай мяжы, а потым атрымалася, што варта сабраць усё, што звязана з вераснем 1939 года. Пры гэтым, калі вось ужо пачалі ездзіць экспедыцыяй, збіраць архіўныя матэрыялы, то атрымалася, што не толькі вайсковыя пахаванні, але цікавыя і цывільныя, грамадзянскія пахаванні.
На думку гісторыка, перыяд вайны 1939 года ў Беларусі нецікавы:
– Гэтую кнігу рыхтаваў на 80-ую гадавіну з моманту пачатку Другой сусветнай вайны. Чакаў таго, што ў Беларусі гэтую дату паспрабуюць замаўчаць, паспрабуюць не заўважыць. Так атрымалася, што вялікія дзве даты – 1 верасня і 17 верасня – з боку дзяржавы амаль ніяк не былі заўважаны. Але, дзякуй Богу, у мяне атрымалася гэтую кнігу падрыхтаваць, сабраць вялікі матэрыял фатаграфічны. Гэта арыгінальныя здымкі з майго ўласнага архіву, з іншых дзяржаўных архіваў, напрыклад, польскіх, беларускіх, а таксама сучасныя здымкі гэтых пахаванняў.
Гісторык Ігар Мельнікаў рыхтуе да выдання новую кнігу «На мяжы цывілізацый», якая з’явіцца ў свет у 2020-м годзе.
Беларускае Радыё Рацыя Фота Сяргея Апановіча
Глядзіце таксама
