Калядны «Годны двор»
24 студзеня а 20:00 адбудзецца калядны выпуск інтэрактыўнага youtube-шоу «Годны двор».
Як высветлілася, каза не вельмі дапамагае ў барацьбе з каронавірусам, але ў годных калядаваннях яе эфектыўнасць мае быць большай. Далучайцеся да дваровай анлайн-сустрэчы, каб адзначыць свята ў найлепшых беларускіх традыцыях!
Сустрэча пройдзе тут: https://youtu.be/_WnoBnxq8fY
Гэтым разам Сяржук Доўгушаў у жывым эфіры навучыць гледачоў сапраўднаму беларускаму калядаванню (так, Каза таксама ў спісе запрошаных гасцей!), прадэманструе, якія песні трэба спяваць і як правільна таньчыць.
Лера Яскевіч і Дзяніс Дудзінскі падзеляцца досведам з дзяцінства, як было прынята калядаваць у іх дварах і раскрыюць лайфхакі, як назбіраць найбольш цукерак.
Музычны настрой створыць Вольны хор. Сюрпрызы будуць!
Вядоўцамі шоу будуць піяр-менеджарка Шчучыншчыны — Алена Зуй-Вайцехоўская і gonzo-беларус Антон Мартыненка.
«Годны двор» – прастора для «лямпавых» сустрэч. Шточацвер ладзяцца тэматычныя сустрэчы з выбітнымі беларусамі, натхняльныя live-канцэрты і ўтульная атмасфера жывых чатаў. Каранцінныя абмежаванні тут не дзейнічаюць, а маразы не страшныя. Цёпла, бяспечна і ў кампаніі сваіх людзей.
Гасцям можна будзе не толькі задаць пытанне, але і папрасіць перадаць прывітанне, прачытаць вершык ці распавесці анекдот. А што адбудзецца на наступных сустрэчах — вырашаць самі гледачы і ўдзельнікі.
Паводле прэс-рэлізу
