Канцэрт Дзядзі Вані адмянілі ў Гомелі
Пасля выказванняў спевака і шоумена Дзядзі Вані (Іван Вабішчэвіч) аб прэзідэнцкіх выбарах адменены яго канцэрт у Гомелі, запланаваны на Дзень Незалежнасці.
Канцэрт павінен быў прайсці 3 ліпеня на набярэжнай Сожа. Яго арганізатарам выступіла „Правда Радио”. Па горадзе былі размешчаныя афішы, анонс канцэрта публікавала на сваім сайце дзяржаўная газета „Гомельская праўда”.
Інфармацыю аб адмене канцэрта БелаПАН пацвердзіў Іван Вабішчэвіч: „Канцэрт адменены, адмененае фінансаванне”. Артыст не змог наўпрост адказаць на пытанне, ці звязаная адмена канцэрта з яго выказваннямі аб сітуацыі ў Беларусі. „Я не імкнуўся ведаць падрабязнасці”, — сказаў ён. І дадаў: „Мы ўсе разумныя людзі”.
Раней спявак напісаў у Instagram, што ганарыцца людзьмі, якія зразумелі, што яны не „народзец, а народ”, тымі, хто перастаў баяцца. „Я ганаруся тымі, хто, нягледзячы на перашкоды і цяжкасці, пакарміў, дапамагаў і працягвае дапамагаць лекарам. Я ганаруся лекарамі, якія, нягледзячы на ўсе цяжкасці і „ўмоўную” падтрымку дзяржавы, працягваюць лячыць, ратаваць людзей і не шкадаваць сябе. Я ганаруся тымі, хто не пабаяўся сказаць „не”, нават калі яму пагражае звальненне. Аказалася, што не ўсе могуць быць звольненыя або заключаныя ў турму. Я ганаруся тым, што многія ўжо зрабілі свой выбар. Я ганаруся тым, што ўсё больш і больш людзей пачынаюць думаць і разважаць. Людзі, якія сталі сумленнымі з сабой!” — напісаў Вабішчэвіч.
Музыкант таксама паведаміў, што пойдзе на выбары прэзідэнта, каб прагаласаваць за таго, каго лічыць патрэбным, і спадзяецца, што ўсе так зробяць.
Каментуючы апошнія падзеі ў краіне і дзеянні ўладаў, ён адзначыў: „На мой погляд, гэта страх. І той, хто баіцца, не можа весці людзей. Страх заразлівы. Я нават не буду ўдавацца ў падрабязнасці пра тое, хто больш баіцца — той, што вышэй, або той, што ніжэй… Гэта ўжо не мае значэння. Змены патрэбныя!”
belapan.by
Фота show-biz.by
