„Касцёлы Гарадзеншчыны” ў „Тызенгаўзе”
Больш за 20 мастацкіх працаў, прысвечаных сакральнай архітэктуры Гарадзеншчыны, можна ўбачыць на выставе “Касцёлы Гарадзеншчыны”, што адкрылася ў гарадзенскай выставачнай зале “Тызенгаўз”. Выстава стала вынікам міжнароднага пленеру, у якім прынялі ўдзел мастакі з Беларусі, Украіны, Літвы і Польшчы.
Пра выставу распавядае мастацтвазнаўца Ала Матук:
– Для таго, каб напісаць такія прыгожыя цёплыя карціны, мы хадзілі не толькі па Гародні, але ездзілі і ў Наваградак, Васілішкі. Вядома, нашы госці крыху падгледзелі некаторыя ідэі ў інтэрнэце. І ў выніку ў нас атрымалася вельмі цёплая экспазіцыя, дзе кожны прадставіў сваю рэфлексію датычна архітэктуры Гарадзеншчыны.
Павел Кастусік – мастак з Менска:
– На гэтай выставе тэмай майго палатна выступае касцёл. Але не канкрэтны, а такая выява з маіх мараў.
Анна Ірміна Бонк:
– Я прадстаўляла даволі традыцыйныя касцёлы ў рэалістычным ключы. Якраз на гэтых дзвюх працах прадстаўляла касцёлы з цэнтра Гародні.
На адкрыццё выставы завіталі актывісты незалежнага Саюзу палякаў у Беларусі, дыпламаты з Генеральнага консульства Рэспублікі Польшча, а таксама гарадзенскія мастакі ды аматары мастацтва. Выстава будзе працаваць цягам трох тыдняў.
[Not a valid template]
Беларускае Радыё Рацыя, Гародня
