Католікі вярнулі пляцоўку, дзе стаяў узарваны савецкімі ўладамі храм
Беларускім католікам перадалі ўчастак зямлі ў Стоўбцах, на якім раней стаяў гістарычны касцёл, піша katolik.life. Два гады таму на гэтай тэрыторыі былі знойдзены старажытная магіла і парэшткі манаха Фабіяна Малішоўскага, які памёр у 1644 годзе.
-
Фота: katolik.life
У 1953 годзе савецкія ўлады ўзарвалі храм, які тут знаходзіўся. І доўгі час на гэтай пляцоўцы размяшчалася спартовая плацоўка сярэдняй школы.
„Вернікі, якія выязджалі са сваіх дамоў, хаваючыся ад рэлігійнага і сацыяльнага пераследу пасля Другой сусветнай вайны ў Польшчу, схавалі парэшткі ў сутарэннях касцёла, і пакінулі адпаведны план ў курыі біскупа ў Драгічыне. Доўгія гады ніхто не ведаў дзе знаходзіцца “святы Фабіян”, пакуль не прыйшоў час”, — распавядае выданне katolik.life.
-
Ксёндз Ігар Лашук са знойдзенай труной айца Фабіяна, фота: katolik.life
Цяпер гэтую зямлю атрымала мясцовая каталіцкая парафія. Тут плануюць адбудаваць капліцу святога Дамініка і аднавіць склепы, дзе месцяцца пахаванні фундатараў і манахаў-дамініканаў. Ужо цяпер адбудаваныя частка былой касцёльнай агароджы і брама-званіца.
