КіНАНОЧ ад WATCH DOCS Belarus у Віцебску
Фестываль дакументальнага кіно аб правах чалавека WATCH DOCS Belarus падрыхтаваў віцебскім аматарам разумнага кіно выдатныя выходныя: адразу чатыры моцныя фільмы ў БіТЛЗ-КЛУБЕ ( «Чердачок») у ноч з суботы на нядзелю.
З’явілася выдатная нагода праверыць у Віцебску папулярны ў многіх гарадах фармат кінаночы.
Неанацызм – гэта смешна
Такі погляд ўласцівы віту Клусаку – ужо прызнанаму рэжысёру-дакументалісту з Чэхіі, які зняў дакументальную камедыю «Белы свет вачыма Даліборэка» (2017). Гэты фільм ужо паспеў выйграць прызы на міжнародных фестывалях IDFA і Karlovy Vary і выклікаць эмацыйныя рэакцыі на іншых рэгіянальных паказах WATCH DOCS ў Беларусі. На будучыні фестывалі ў Менску ў снежні «Даліборэк» стане фільмам адкрыцця – так што вы проста не можаце ўпусціць яго ў Віцебску!
Адкрыта пра сэкс
Ноч – самы час для інтымных тэм. „Спытай сэксперта” (2017, Індыя) – яшчэ адна камедыя ў праграме кінаночы. Фільм аб самых няёмкіх і нечаканых пытаннях пра тонкасці сэксуальнага жыцця, на якія адказвае 93-гадовы калумніст штодзённай газеты ў Мумбаі. Ёсць над чым пасмяяцца і над чым задумацца пра сэксуальную адукацыю ў нас!
Power pussy in da house
«Сільвана» (2017, Швецыя) – яшчэ адна кінастужка, поўная сэксуальнасці і неадназначных пытанняў. Інтымная гісторыя скандальнай шведскай панк-рэпершы, лесбіянкі і феміністкі. Фільм з выбітнай кліпавай дынамікай і выдатнай аператарскай работай: вывераныя партрэтныя кадры і тонкі псіхалагізм – гэта адназначна лепш за самы салодкі сон у лістападаўскую ноч.
Афрыканскія страсці
Для самых стойкіх – фільм, які натхняе быць тым, хто ты ёсць і ламаць сістэму з дапамогай музыкі, кіно і тэатра, архітэктуры, эка-свядомасці… „Мастацтва супраціву ў Буркіна Фасо„ (2018, Буркіна Фасо, ЗША, Балгарыя) наблізіць да нас, беларусаў, Афрыку з-за відавочных паралеляў і пакіне прыемнае послевкусіе пашыранага далягляду.
На месцы будуць гарбата, кава і печыва. Бярыце з сабой свае любімыя пачастункі, а таксама пледы і спальнікі, каб ўладкавацца ямчэй!
Вялікая просьба ад арганізатараў ўстрымацца ад спакусы прынесці з сабой алкаголь.
Мерапрыемства адбудзецца: 10 лістапада, БІТЛЗ-КЛУБ ( «Чердачок»)
вул. Кастрычніцкая, 12, пачатак: 23:59, сканчэнне: 5:40 11 лістапада.
Уваход вольны!
Паводле прэс-рэлізу
Глядзіце таксама
