Кніга, якая даводзіць, што Беларусь еўрапейская краіна
Пабачыла свет новая кніга старшыні Таварыства беларускай мовы Алега Трусава. Гэтым разам яна прысвечана архітэктуры і мае назоў “Кароткая гісторыя архітэктуры Беларусі”. Упершыню гаворка ідзе пра архітэктуру на тэрыторыі Беларусі: ад эпохі палеаліту – да канца савецкай эпохі. Расказвае аўтар:
– Кніга мае 330 ілюстрацый і ўпершыню ахоплівае такія невядомыя галіны, як, напрыклад, архітэктура Заходняй Беларусі за польскім панаваннем, ёсць раздзел пра адносіны да культавых помнікаў у БССР і СССР, то бок ёсць некаторыя моманты, пра якія я пішу ўпершыню. І самае галоўнае, у кнізе паказана, што мы фактычна еўрапейская краіна, што ўсе еўрапейскія стылі ў нас ёсць, я таксама пра гэта пішу.
Акрамя культавага і абарончага дойлідства, аўтар разглядае жыллё вяскоўцаў і гараджанаў у розныя эпохі, будаўніцтва прадпрыемстваў, дарог, мастоў і каналаў. Кнігу выдала выдавецтва “Харвест” тыражом у адну тысячу экземляраў.
Як паведаміў аўтар, кніга з’явіцца ў менскіх кнігарнях у сярэдзіне наступнага тыдня.
Васіль Кроква, Беларускае Радыё Рацыя
Глядзіце таксама
