Кніга Змітра Саўкі адзначана ў конкурсе на найлепшую навуковую манаграфію
Манаграфія Змітра Саўкі «Фанэтычна-графічная адаптацыя запазычаньняў у беларускай мове», выдадзеная кафедрай беларусістыкі Варшаўскага ўніверсітэта, адзначана ў конкурсе на найлепшую навуковую манаграфію па беларускай і ўкраінскай культуры імя Мялеція Сматрыцкага, што адбываецца пад патранатам рэктара Варшаўскага ўнівэрсітэта. Гэта была тэма кандыдацкай дысертацыі Змітра Саўкі, якую ён не паспеў абараніць.
Узнагароду ўручаюць за найлепшую навуковую манаграфію.
Заўчасна памерлы аўтар кнігі атрымаў узнагароду In memoria за ўсю сваю дзейнасць для развіцця беларускай мовы.
Сярод лаўрэатаў конкурсу быў таксама выпускнік і сябар кафедры беларусістыкі – доктар Міраслаў Янковяк, узнагароджаны за манаграфію «Лексыка беларускіх гаворак Літвы. Моўная спадчына балта-славянскага памежжа».
Зміцер Саўка (1965-2016) – беларускі мовазнаўца. Працаваў выкладчыкам у Лінгвістычным універсітэце, стыль-рэдактарам на Радыё Рацыя, вёў аўтарскую праграму «Моўнік» на тэлеканале «Белсат». Стваральнік моўнага сэрвісу «Добрапіс», які дапамагае выпраўляць памылкі ў тэкстах на беларускай мове.
Беларускае Радыё Рацыя
