Кшыштаф Каміль Бачыньскі: анлайн-прэзентацыя кнігі «Выбраныя вершы»
12 лістапада ў межах «Літаратурнага лістапада» адбудзецца анлайн-прэзентацыя зборніка К.К.Бачыньскага «Выбраныя вершы», што выйшаў у серыі «Паэты планеты» ў выдавецтве Змітра Коласа.
Дата: 12-га лістапада.
Час: 18.00, на старонцы «Прастора польскай культуры».
У 2021 годзе споўнілася сто гадоў геніяльнаму польскаму паэту Кшыштафу Камілю Бачыньскаму (1921-1944), бясспрэчнаму лідару «пакалення Калумбаў», што трагічна загінуў у 23 гады на чацвёрты дзень Варшаўскага паўстання.
Беларускія перакладчыкі прадставяць кнігу, пачытаюць свае перастварэнні польскага паэта і абмяркуюць наступныя пытанні:
Як з’явіўся (і ці ёсць удалым) тэрмін «пакаленне Калумбаў»?
«Да болю мы ўжо дараслі»: ці яднае дваццацігадовых паэтаў толькі агульны лёс, ці можна казаць пра стылістычнае падабенства пакалення?
Эстэтычная праграма і этычныя імператывы К.К.Бачыньскага: захаваць сябе ці ахвяраваць сабой?
«Мой цягнік прыбудзе адразу з усіх бакоў»: феномен паскоранага сталення творцы ў нечуваных раней умовах.
Эвалюцыя творчасці: ад ранняй віртуознай музычнасці — праз эмацыйнасць катастрафіста — да класічнай ураўнаважанасці вобразу.
Паэтычныя адкрыцці: надзённае і ўніверсальнае.
«Белая магія»: любоўная лірыка паэта.
Падарожжа на край трызнення — хворая відзежа як форма вызвалення.
Калядоўшчык роспачы і надзеі.
«Не хвалюйся, ад шчасця ўцячы немагчыма»: дыялектыка сур’ёзнага і жартоўнага ў эпісталярнай лірыцы Бачыньскага.
Які Бачыньскі адгукаецца сучаснаму беларускаму перакладчыку і чытачу?
У прэзентацыі прымуць удзел выдавец Зміцер Колас, перакладчыцы Кацярына Маціеўская і Ганна Янкута, а таксама мадэратар і адзін з перакладчыкаў Андрэй Хадановіч.
