Куды падзеўся рэтрацягнік?
27 снежня 2012 года добра запомніўся тым, хто прымаў удзел у святкаванні 150-годдзя Беларускай чыгункі. На чыгуначным вакзале пачуўся ўжо прызабыты гудок паравоза. У Гародню прыбыў адноўлены рэтрацягнік. У яго ў складзе паравоз і два вагона. Каб сабраць адзін спраўна дзеючы лакаматыў, з Крычава прыгналі два паравозы, паведамляе grodnonews.by.
Запоўнены ўдзельнікамі свята цягнік адправіўся ў Парэчча.
Так быў пакладзены пачатак рэалізацыі праекта стварэння гісторыка-турыстычнага комплексу Беларускай чыгункі на ўчастку Гародня-Парэчча. Яго распрацаваў інстытут «Гроднаграмадзянпраект». Пасля юбілейных урачыстасцяў Баранавіцкае аддзяленне БЧ адклала праект на няпэўны час.
Зараз рэтрацягнік стаіць на запасным шляху чыгуначнай станцыі Ваўкавыск. Акрамя яго, тут знайшлі прытулак яшчэ тры паравозы. Лакаматыў рэтрацягніка спраўны і хоць сёння можа выехаць, толькі падкінь вугольчыка.
Раз-два ў год яго буксіруюць у Баранавічы на вялікія святы і паказваюць гараджанам. А вось да Гародні, куды па праекце павінен быў курсаваць, ён пакуль не дайшоў. Чаму б гэта не зрабіць, напрыклад, хаця б у час правядзення XI Рэспубліканскага фестывалю нацыянальных культур?
Фота БелТА
Глядзіце таксама
