Месяц польскай літаратуры распачнецца 9 лістапада
На працягу месяца імпрэзы адбудуцца на самых розных пляцоўках горада. Урачыста адкрые «Месяц польскай літаратуры’2017» прэзентацыя кнігі ўспамінаў Зыгмунта Мінейкі.
Цягам лістапада Польскі Інстытут у Мінску правядзе шэраг рознафарматных літаратурных імпрэзаў — прэзентацыі кніг, сустрэчы з польскімі пісьменнікамі і іх беларускімі перакладчыкамі, паэтычныя чытанні, прэзентацыю літаратурна-мастацкай выставы і шмат чаго яшчэ.
А нагодай для гэтага з’яўляецца традыцыйны, вядомы ўжо многім аматарам прыгожага слова “Месяц польскай літаратуры”. У гэтым годзе імпрэзы “Месяца” захопяць самыя розныя пляцоўкі горада: мы чакаем вас у музеі, бібліятэцы, галерэі, студэнцкай аўдыторыі і ў бары таксама.
УВАХОД ВОЛЬНЫ на ўсе імпрэзы.
9.11 (чацвер), 18:00. Урачыстае адкрыццё “Месяца польскай літаратуры’2017”. Прэзентацыя кнігі ўспамінаў Зыгмунта Мінейкі “З ТАЙГІ ПАД АКРОПАЛЬ” з удзелам перакладчыцы Марыны Запартыка, гісторыкаў Вольгі Гарбачовай і Дзмітрыя Матвейчыка; вядзе Андрэй Хадановіч, грае трыа “Вытокі”.
Музей “Дом Ваньковічаў” (вул. Інтэрнацыянальная, 33А).
14.11 (аўторак), 16:00. “ДЖОЗЭФ КОНРАД. ПАСАЖЫР З НАСТРОМА” — вернісаж літаратурна-мастацкай выставы да 160-годдзя з дня нараджэння сусветна вядомага пісьменніка Джозэфа Конрада.
Нацыянальная бібліятэка Беларусі (пр. Незалежнасці, 116).
17.11 (пятніца), 20:20. “36 М² ДУМАК”. Паэтычны вечар з Даротай Коман — прэзентацыя беларускамоўнага выдання зборніка вершаў. З удзелам аўтаркі і перакладчыка Андрэя Хадановіча. Сустрэча пройдзе ў рамках фестывалю “Знак роўнасці”.
Галерэя “Тут.бай” (праспект Дзяржынскага, 57. Бізнэс-цэнтр Omega Tower, 9-ты паверх).
23.11 (чацвер), 19:00. “ТЭОРЫІ ЛІТАРАТУРЫ ХХ СТАГОДДЗЯ” — найважнейшыя тэорыі літаратуры ў адным томе! Ад бясспрэчных аўтарытэтаў польскага літаратуразнаўства А. Бужыньскай і М.П. Маркоўскага. Прэзентацыя беларускамоўнага выдання з удзелам аўтараў і перакладчыкаў.
Філалагічны факультэт БДУ (вул. К. Маркса, 31, аўд. 304).
30.11 (чацвер), 19:00. “ПРАРОК ІНШАСВЕТУ. БАЛЯСЛАЎ ЛЕСЬМЯН” — да 140 гадоў з дня нараджэння і 80 гадоў з дня смерці знакамітага польскага паэта. Прэзентацыя перакладу зборніка вершаў на беларускую мову. З удзелам перакладчыц Марыі Мартысевіч, Кацярыны Маціеўскай і Ганны Янкуты. Спецыяльны госць — польскі перакладчык, кіраўнік польска-беларускіх перакладчыцкіх семінараў Адам Паморскі.
Бар “Ў” (Незалежнасці, 37а).
Паводле прэс-службы Польскага Інстытуту ў Мінску
