Мікола Купава: Скарына нам дадзены на штодзень і на кожную гадзіну
Вядомы беларускі мастак Мікола Купава, аўтар соцень графічных прац, а таксама твораў у розных выяўленчых тэхніках і жанрах, вядомы ілюстратар кніжных выданняў, прапануе да распаўсюду мастацкі каляндар на 2022-гі год.
Каляндар прысвечаны 500-м угодкам “Малой падарожнай кніжкі”, выдадзенай Францыскам Скарынам у 1522-м годзе ў Вільні. Мастак лічыць, што такая ўжытковая рэч, як каляндар, стане і данінай павагі, і добрым сродкам распаўсюду ведаў пра беларускага першадрукара:
– Чалавек, выходзячы з хаты, паклоніцца Скарыну. І, вяртаючыся, здыме шапку каля таго месца, дзе вісіць гэты каляндар. Нехта кланяецца Пацуку або Тыгру сёлета. А мы можам кожны дзень глядзець на Скарыну і кланяцца яму. Скарына нам дадзены на штодзень, на кожную хвіліну і на кожную гадзіну.
Мікола Купава даўно займаецца вывучэннем дзейнасці Францыска Скарыны, і шмат сваіх мастацкіх прац прысвяціў менавіта беларускаму першадрукару. У 1988-м годзе мастак быў узнагароджаны дыпломам і медалём імя Францыска Скарыны за мастацкае афармленне энцыклапедычнага даведніка “Францыск Скарына і яго час”. Усім ахвотным займець каляндар, прысвечаны 500-м угодкам “Малой падарожнай кніжкі”, спадар Купава прапануе раздрукаваць яго з ужо гатовага макета. Для гэтага можна звяртацца непасрэдна да аўтара на электронную пошту [email protected] або праз тэлефон +375 29 551 32 36.
Беларускае Радыё Рацыя
